QHL: «Barys» elordada SKA komandasynan jeńildi
NUR-SULTAN. QazAqparat - Búgin elordalyq «Barys» qurlyqtyq hokkeı lıgasyndaǵy kezekti kezdesýinde Reseıdiń SKA (Sankt-Peterbýrg) komandasyn qabyldady, dep habarlaıdy QazAqparat tilshisi.
SKA - qurlyqtyq hokkeı lıgasyndaǵy úzdik komandalardyń biri. Bıyl da týrnır kestesindegi úzdik úshtikten kórinip keledi. Eki komanda arasyndaǵy kezdesýde budan buryn reseılik klýb kóbirek jeńiske jetken. Olar búgingi kúnge deıin elordalyq klýbtan 17 márte basym tússe, nebári 4-i «Barystyń» jeńisimen aıaqtalǵan. Qazaqstandyq klýb atalmysh qarsylasyna sońǵy 7 oıynda ese jiberip qoıdy.
Búgingi kezdesýde «Barys» alǵashqy bolyp esep ashqan edi. Oıyn bastalǵanyna nebári 11 sekýnd ótkende elordalyq hokkeıshi Atte Ohtamaa qarsylas komanda qaqpasyn dál kózdedi. Degenmen odan keıin aıdyn ıeleri 3-mınýtta óz qaqpasyna eki shaıba jiberip aldy. Bul ýaqytta reseılik klýb sapynan Iorı Lehterıa men Artem Zýb mergendik tanytty. Al 11-mınýtta Artem Zýb atalmysh oıyndaǵy ekinshi shaıbasyn soqty. Budan keıin 12-mınýtta «Barys» hokkeıshisi Alekseı Maklıýkov esep aıyrmasyn qysqartqan bolatyn.
Ekinshi kezeńde qazaqstandyq hokkeıshiler tarazy basyn teńestirýge umtyldy. Esesine óz qaqpasyna úsh shaıba jiberip aldy. Aldymen SKA sapynan Naıl ıAkýpov 25-mınýtta goldyń avtory atansa, odan keıin 28-mınýtta Vasılıı Tokanov esepti ulǵaıtty. Al 37-mınýtta reseılik komanda hokkeıshisi Artem Zýb búgingi kezdesýde het-trıktiń avtory atandy.
Úshinshi kezeńde eki klýb tarapynan toalsyz shabýyl órbidi. Degenmen tablodaǵy esep ózgergen joq. Nátıjesinde «Barys» qarsylasynan 2:6 esebimen jeńilip qaldy.
Budan buryn elordalyq klýb «Spartak» komandasynan jeńilip qalǵan edi.
«Barys» endi elordada úsh oıyn ótkizedi. Aldymen 27 jeltoqsanda «Dınamo» (Máskeý) komandasyn qabyldasa, odan keıin 29 jeltoqsanda «Avtomobılıst» (Ekaterınbýrg), 30 jeltoqsanda Qytaıdyń «Kýnlýn Red Star» komandasymen muz aıdynǵa shyǵady.
Foto: www.hcbarys.kz
