QHL: «Barys» elordada «Neftehımıkten» basym tústi
NUR-SULTAN. QazAqparat - Búgin elordada «Barys» Qurlyq hokkeı lıgasyndaǵy kezekti kezdesýinde Reseıdiń «Neftehımık» (Nıjnekamsk) komandasyn qabyldady, dep habarlaıdy QazAqparat tilshisi.
«Barys» búgin pleı-off kezeńine shyǵý múmkindigin sheshýi múmkin bolatyn. Ol úshin elordalyq klýb jeńiske jetip, Qytaıdyń «Kýnlýn Red Star» komandasy Reseıde «Traktordan» jeńilýi tıis edi.
Qazaqstandyq hokkeıshiler oıyndy qarqyndy shabýylmen bastady. Qarsylastar qaqpasy mańynda birneshe qaýipti sát uıymdastyrdy. Oǵan reseılik komanda laıyqty tosqaýyl qoıdy.
Alǵashqy shaıba ekinshi kezeńde soǵyldy. Ony 21-mınýtta «Barys» sapynan Darren Dıts óziniń enshisine jazdy. Budan keıin reseılik hokkeıshiler tarazy basyn teńestirýge barynsha umtyldy. Soǵan qaramastan ekinshi kezeńde tablodaǵy esep ózgergen joq.
Úshinshi kezeń reseılik hokkeıshilerdiń basymdyǵymen bastaldy. Oıyn tizginin qolǵa alǵan «Neftehımık» hokkeıshileri «Barys» qaqpasy mańyna jıi keldi. Nátıjesinde 44-mınýtta Mett Ýaıt mergendigin kórsetti. Al 49-mınýtta qazaqstandyq hokkeıshi Anton Sagadeev «Barysty» qaıtadan alǵa shyǵardy. Kezdesýde «Barys» 2:1 esebimen basym tústi. Dál qazir pleı-off kezeńine shyǵýǵa jaqyn tur. «Kýnlýn Red Star» Reseıdiń Chelıabi qalasynda jergilikti «Traktorynan» 0:1 esebimen jeńilip jatyr.
Elordalyq klýb endi 1 aqpanda «Avangard» (Omby) klýbymen kezdesedi.
«Barys» budan buryn Reseıdiń «Avtomobılıst» komandasynan basym tústi.
