QHL: «Barys» ekinshi oıyn qatarynan jeńilip qaldy
ASTANA. QazAqparat - Elordada jergilikti «Barys» Máskeýdiń «Dınamo» (Reseı) klýbyn qabyldady. Qurlyqtyq hokkeı lıgasyndaǵy bul oıynda bizdiń komanda 2:3 esebimen jol berdi, dep habarlaıdy QazAqparat tilshisi.
Burynǵy jyldarda «Dınamo» qurlyqtyq hokkeı lıgasynda táp-táýir nátıjemen kózge túsip júrgen edi. Atalmysh básekede 2011/2012, 2012/2013 jyldarda bas báıgege qol sozdy. Gagarın kýbogyn tóbesine kóterdi. Odan keıingi jyldarda mundaı tabysqa qol soza almaı keledi. Dese de komanda eshqandaı qarsylasynyń yǵyna jyǵyla qoımaıtyny taǵy bar. Sondyqtan bul kezdesý «Barys» úshin oǵaıǵa soqpaıtyny belgili edi.
«Barys» bıyl 24 qyrkúıekte «Dınamomen» Máskeýde kezdesip, ol oıynda 3:2 esebimen jeńiske jetken edi.
Dese de búgingi oıyn «Barys» úshin sátti bastaldy. Kezdesýdiń alǵashqy mınýtynda astanalyq hokkeıshiler esep ashyp úlgerdi. Oǵan áriptesteri Darren Dıts pen Roman Starchenko ádemi pas shyǵaryp berdi. Birinshi kezeńde eki komandalar qanshama qaýpti sátter uıymdastyrǵanymen odan eshbir nátıje kele qoıǵan joq.
Ekinshi kezeńde «Dınamo» tarazy basyn teńestirip ketti. Bul gol 30-mınýtta soǵyldy. Ol Vladımır Brıýkvınniń enshisine jazyldy. Budan keıin esepti ulǵaıtatyn sátter bolǵanymen olar eshbir paıda alyp kele qoıǵan joq.
Úshinshi kezeńde «Dınamo» alǵa shyqty. 44-mınýtta Vadım Shıpachev mergendik tanytty. Bul aıdyn ıeleriniń shıraq qımyldaýyna áser etti. «Barys» hokkeıshileri qarsylastar qaqpasy mańyna lap qoıdy. Dese de olar kózdegen maqsattaryna jete almaı jatty. 54-mınýtta «Barys» sapynan Dastın Boıd tarazy basyn teńestirdi. Budan keıin esep ózgergen joq. Oıyn overtaımǵa ulasty. Overtaımda «Dınamo» jeńis shaıbasyn soqty. Esep 3:2. «Dınamo» jeńiske jetti. «Barys» osylaısha qatarynan eki oıyn jeńildi.
Esterińizge sala ketelik, budan buryn «Barys» óz aıdynynda Habarovskiniń «Amýr» komandasynan 5:6 esebimen jeńilip qaldy. Onyń aldynda syrt aıdynda úsh oıyn ótkizip, onyń barlyǵynda jeńiske jetken bolatyn. Aldymen Mınskiniń «Dınamo» (Belarýs) klýbyn 3:2 esebimen, Bratıslavanyń «Slovanyn» negizgi kezeńde jeńse, Novosibirdiń «Sıbırinen» overtaımda 2:1 esebimen basym tústi.
Endi «Barys» óz aıdynynda bir kezdesý ótkizedi. 18 qarashada Ýfanyń «Salavat ıÝlaev» komandalarymen sheberlik baıqasady. «Barys» atalmysh eki komandamen bıyl bir-birden kezdesý ótkizip qaıtqan edi. 22 qyrkúıekte «Salavat ıÝlaevtan» 3:7 esebimen jeńilse, 24 qyrkúıekte Máskeýdiń «Dınamosynan» overtaımda 3:2 esebimen basym tústi.
