QHL: «Barys» burynǵy bas bapkeriniń komandasyn oısyrata jeńdi
ASTANA. QazAqparat - Búgin elordalyq «Barys» qurlyqtyq hokkeı lıgasynyń alǵashqy týrynda syrt alańda Reseıdiń Nıjnekamsk qalasynyń «Neftehımık» komandasymen kezdesti, dep habarlaıdy QazAqparat tilshisi.
«Barys» bıylǵy dodany jańa bapkermen bastap otyr. Komandaǵa Belarýs mamany Andreı Skabelka bas bapkerlik etedi. Ol budan buryn Reseıdiń «Metallýrg» (Novokýznetsk), «Torpedo» (Nıjnıı Novgorod), «Sıbır», «Avangard», Belarýstiń «Gomel» jáne atalmysh eldiń ulttyq quramasynda bas bapkerlik qyzmet atqarǵan.
«Barys» qurlyqtyq hokkeı lıgasyna bıyl 11 márte qatysyp otyr. Elordalyq klýb 2015/2016, 2017/2018 jyldardaǵy maýsymda toptyq kezeńnen árige asa alǵan joq. Bıyl qalaı bolady? Ony maýsym barysynda kóre jatarmyz.
Aıta keterligi, «Neftehımık» klýbynda Andreı Nazarov bas bapkerlik qyzmet jasaıdy. Esterińizge sala ketelik, ol «Barys» komandasynda aradaǵy úzilispen 2014-2016 jyldarda qyzmet etken. «Neftehımık» komandasynda 2016 jyldan beri bas bapker bolyp keledi.
Búgingi kezdesýdiń birinshi kezeńinde esep ashylǵan joq. Qazaqstandyq hokkeıshiler ekinshi kezeńde qarsylastar qaqpasynan sańylaý taýyp, olarǵa eki shaıba soǵyp úlgerdi. Soǵylǵan alǵashqy shaıba 24-mınýtta «Barystyń» qataryna bıyl ǵana qosylǵan kanadalyq Patrıs Kormeniń enshisine jazyldy. Oǵan komandalyq áriptesteri Nıkıta Mıhaılıs pen Darren Dıts múmkindik jasady. Arada eki mınýttaı ótkende «Barys» esepti ústemeleı tústi. Soǵylǵan shaıba taǵy bir kanadalyq Darren Dıtstiń qanjyǵasyn maılady.
Qalǵan goldan úshinshi kezeńde soǵyldy. Oıynnyń 42-mınýtynda Nıkıta Mıhaılıs pen Patrıs Kormeniń jasap bergen múmkindigin Roman Starchenko múlt jibergen joq. Al 46 jáne 47-mınýttarda «Neftehımık» óz qaqpasynan eki márte shaıba alyp shyǵýǵa májbúr boldy. Aldymen Brendon Bochenskı men Mettıý Frettın bergen pastan keıin «Barys» sapyndaǵy taǵy bir kanadalyq oıynshy Andre Petersson qaqpany dál kózdedi. Odan keıin Pavel Akolzın elordalyq komanda esebine taǵy bir shaıbany jazdy. Oǵan 57-mınýtta «Neftehımık» sapynan 57-mınýtta ıÝýso Pýýstınen shaıba soǵyp, esep aıyrmasyn qysqartty. Oıyn núktesi 59-mınýtta qoıyldy. «Barys» sapynan Mettıý Frettın bos qaqpaǵa shaıba soqty. Dál osy ýaqytta «Neftehımık» qaqpany bos qaldyryp, alty hokkeıshimen oınap jatqan edi.
«Barys» aldaǵy eki oıyndy da syrt alańda ótkizedi. Aldymen 7 qyrkúıekte Reseıdegi Tatarstan astanasy - Qazan qalasynda jergilikti «Aq Barys» komandasymen muz aıdynǵa shyqsa, 9 qyrkúıekte Nıjnıı Novgorod qalasynda «Torpedo» klýbymen sheberlik baıqasady. Al óz muz aıdynyndaǵy alǵashqy kezdesýin búgingi qarsylasy - «Neftehımık» komandasymen 12 qyrkúıekte ótkizedi.
