QHL: «Barys» «Avtomobılıstiń» jeńisti serııasyn toqtatty
ASTANA. QazAqparat - Búgin qurlyqtyq hokkeı lıgasynda elordalyq «Barys» syrt alańda Ekaterınbýrgtiń «Avtomobılıst» komandasymen kezdesti, dep habarlaıdy QazAqparat tilshisi.
«Avtomobılıst» bıylǵy dodany óte sátti bastady. Búgingi kúnge deıin atalmysh komanda 18 oıyn ótkizdi. Barlyǵynda jeńiske jetti. Qazir týrnır kestesinde kósh basynda tur. Sondyqtan «Barys» úshin bul kezdesý úlken synaq boldy deýge negiz bar. Eki komanda buǵan deıin 24 kezdesýde aıdynǵa shyqty. Aıta keterligi, 15 kezdesýde bizdiń jigitter jeńiske jetse, qalǵanynda «Avtomobılıst» qanjyǵasyn maılady.
Ústimizdegi jyly «Avtomobılıst» tizginin reseılik maman Andreı Martemıanov ustady. Bapker Ekaterınbýrg qalasynyń týmasy. Ol 18 jyl boıy muz aıdyny tórinde óz sheberligin kórsetse, sońǵy 20 jylǵa jýyq bapkerlik qyzmette keledi. Sońǵy bes jyldan beri - bas bapker. Krasnooıarskiniń «Sokol», Orynbor oblysy Orsk qalasynyń «ıÝjnyı Ýral» klýbtarynda eńbek etti. Byltyr Habarovskiniń «Amýr» klýbyna jetekshilik jasady. «Amýr» týrnır kestesinde 13 oryn alyp, pleı-off satysynda Qazannyń «Aq barys» komandasyna jalpy esepte 1:4 esebimen jol berdi. Andreı Martemıanov «Avtomobılıst» komandasyn jańa qyrynan tanytty. Ázirge olar esh jeńilmeı keledi.
Birinshi kezeńde «Barys» jigitteri esep ashty. Astanalyq komandanyń kanadalyq hokkeıshisi Patrıs Korme aıdyn ıeleri qaqpasynan sańylaý tapty. Oǵan áriptesteri Darren Dıts pen Roman Starchenko ádemi pas shyǵaryp berdi. Aıta keterligi, birinshi kezeńde qos komanda da tártip buzbaýǵa tyrysty. «Avtomobılıst» komandasynan birde-bir oıynshy aıdynnan qýylmasa, «Barys» tarapynan tek Alekseı Maklıýkov 2 mınýttyq aıyppen jazalandy.
Ekinshi kezeń bastala salysymen aıdyn ıeleri bizdiń qaqpaǵa birden-aq lap qoıdy. Dese de olar ózderiniń kózdegen maqsattaryna jete almady. Kóp jaǵdaıda «Barys» qaqpashysy Grahovına Domınıktiń sheberligi kózge uryp turdy. 25-mınýtta «Barys» jigitteri aıdyn ıelerin taǵy da qapy qaldyryp ketti. Ol da Patrıs Kormeniń enshisine jazyldy. Aıdyn ıeleri budan keıin gol soǵýǵa umtyldy. Biraq odan esh nátıje shyǵara alǵan joq.
Úshinshi kezeńdi aıdyn ıeleri sátti bastady. 44-mınýtta Fransıs Pare óziniń qanjyǵasyn maılady. Budan keıin de olar esepti teńestirýge baryn saldy. Sońǵy mınýtta olar qaqpashyny oıynshyǵa almastyryp, alty hokkeıshimen bizge qarsy shyqty. Degenmen tarazy basyn teńestirýge shamasy kelgen joq. Esep - 2:1. «Barys» jeńiske jetti. Osylaısha «Barys» «Avtomobılıstiń» 18 oıynǵa sozylǵan jeńisti serııasyn toqtatty.
«Barys» endi 18 qazanda Chelıabide «Traktormen» kezdesedi. Odan keıin bes oıyn qatarynan óz aıdynynda qarsylastaryn qabyldaıdy. Atap aıtqanda, 22 qazanda Mınskiniń «Dınamosymen», 26 qazanda Podolskiniń «Vıtıazimen», 28 qazanda Novosibirdiń «Sıbırimen», 30 qazanda Vladıvostoktyń «Admıralymen», 1 qarashada Chelıabiniń «Traktorymen» kezdesedi.
«Barys» buǵan deıin óz aıdynynda úsh kezdesý ótkizdi. 3 qazanda Máskeýdiń TsSKA komandasynan overtaımda 2:3 esebimen jeńilip qaldy Odan keıin Chehııanyń «Slovan» komandasyn, Latvııanyń «Dınamo» (Rıga) klýbyn 3:1 esebimen jeńdi. Sondaı-aq, 14 qazanda syrt aıdynda Ombynyń «Avangard» klýbyna 3:5 esebimen jol berdi.
