QHL: «Barys» «Avtomobılısten» basym tústi
NUR-SULTAN. QazAqparat - Búgin elordalyq «Barys» qurlyqtyq hokkeı lıgasyndaǵy kezekti kezdesýinde Reseıdiń «Avtomobılıst» (Ekaterınbýrg) komandasyn qabyldady, dep habarlaıdy QazAqparat tilshisi.
Eki komanda týrnır kestesinde qatarlas keledi. Qos klýb bıyl úsh márte kezdesý ótkizip, onyń úsheýinde de jeńimpaz overtaımda anyqtalǵan edi. Onyń ekeýinde «Barys» jeńiske jetse, bireýinde reseılik klýbtyń basymdyǵymen aıaqtaldy.
Búgingi kezdesý de tartysty órbidi. Esepti 2-mınýtta elordalyq Kırıll Panıýkov ashsa, 11-mınýtta «Avtomobılıst» hokkeıshisi Artem Gareev tarazy basyn teńestirdi. Odan keıin qazaqstandyq komanda qatarynan úsh shaıba soqty. Oıynnyń 16, 21-mınýttarynda Roman Starchenko qos goldyń avtory atansa, 29-mınýtta Nıkıta Mıhaılıs reseılik klýb qaqpasynan sańylaý tapty. Al 32-mınýtta «Avtomobılıst» hokkeıshisi Naıdjel Doýs esep aıyrmasyn qysqartty. Oıynda «Barys» 4:2 esebimen jeńiske jetti.
«Barys» budan buryn overtaımda Máskeýdiń «Dınamo» komandasynan jeńildi.
Endi elordalyq klýb 30 jeltoqsanda Qytaıdyń «Kýnlýn Red Star» komandasyn qabyldaıdy.
Foto: www.hcbarys.kz
