QHL: «Barys» «Avtomobılıst» komandasynan basym tústi
NUR-SULTAN. QazAqparat - Búgin elordalyq «Barys» qurlyqtyq hokkeı lıgasyndaǵy kezekti kezdesýinde Reseıdiń «Avtomobılıst» (Ekaterınbýrg) komandasyn qabyldady, dep habarlaıdy QazAqparat tilshisi.
«Barys» sońǵy jeti kezdesýde sátsiz oıyn kórsetti. Jeti oıynnyń altaýynda qarsylasyna ese jiberip qoıdy. Sondyqtan elordalyq klýb búgin jeńiske jetý jolynda bar kúshin salatyny anyq bolatyn.
Dese de esepti alǵash bolyp reseılik klýb ashty. Olardyń qatarynan 9-mınýtta Pıter Holland mergendik tanytty. Budan keıin qazaqstandyq hokkeıshiler qansha shabýyl uıymdastyrdy. Soǵan qaramastan tablodaǵy esep ózgergen joq.
Ekinshi kezeńde de elordalyq hokkeıshiler alǵa umtyldy. Alaıda birazǵa deıin qarsylastaryn qapy qaldyra alǵan joq. Al 29-mınýtta «Barys» hokkeıshisi Dmıtrıı Shevchenko tarazy basyn teńestirdi.
Úshinshi kezeń bastalǵannan keıin «Avtomobılıst» taǵy da alǵa shyqty. Bul joly Naıdjel Doýstyń qanjyǵasyn maılandy. Naıdjel Doýs byltyr elordalyq komanda namysyn qorǵaǵan bolatyn. Al 45-mınýtta «Barys» sapyna jaqynda ǵana qosylǵan Lınýs Vıddel tarazy basyn teńestirdi. Budan keıin qos komanda oıynshylary ashyq shabýylǵa shyqty. Oıynnyń negizgi kezeńi 2:2 esebimen teń aıaqtaldy. Oıyn overtaımǵa ulasty. Overtaımda Darren Dıts soqqan gol «Barysqa» jeńis syılady.
Búgingi oıynnan keıin elordalyq klýb jalpy týrnır kestesinde jetinshi orynǵa kóterildi. Al shyǵys konferentsııasynda tórtinshi, Chernyshev dıvızıonynda úshinshi orynǵa jaıǵasty.
«Barys» endi eki oıynyn elordada ótkizedi. Aldymen 22 qarashada Reseıdiń «Ak bars» (Qazan), odan keıin «Amýr» (Habarovsk) komandalaryn qabyldaıdy.
