QHL: «Barys» «Avangardtan» jetinshi oıyn qatarynan jeńildi
ASTANA. QazAqparat - Elordalyq «Barys» Ombynyń «Avangard» (Reseı) komandasymen qurlyqtyq hokkeı lıgasy shyǵys konferentsııasynda pleı-off kezeńiniń jartylaı fınalynyń alǵashqy oıynyn ótkizdi, dep habarlaıdy QazAqparat tilshisi.
Esterińizge sala ketelik, pleı-off kezeńiniń shırek fınalynda «Barys» Nıjnıı Novgorodtyń «Torpedo» komandasyn orta jolda qaldyryp ketti. Jeti kezdesýge sozylǵan oıyndar serııasynda elordalyq klýbtyń joly boldy. Jeńimpaz sońǵy kezdesýde anyqtaldy .
Budan buryn habarlaǵanymyzdaı, jartylaı fınalda jolyqqan «Avangard» komandasy - «Barys» úshin qolaısyz qarsylas. «Barys» pen «Avangard» komandalary búgingi kúnge deıin 46 márte kezdesken. Onyń 31-i «Avangardtyń» basymdyǵymen aıaqtalsa, 15-de «Barys» jeńiske jetti.
Aıta keterligi, sońǵy alty oıynnan beri bizdiń komanda atalmysh qarsylasyn tize búktire almaı keledi. Sońǵy márte «Barys» ombylyq klýbty 2017 jyldyń 10 qazanynda 4:3 esebimen jeńgen edi. Eki komanda búgingi kúnge deıin pleı-off kezeńinde baq synasyp kórgen joq. Sondyqtan bul saıys qos komandaǵa da úlken syn bolǵaly tur.
Búgingi kezdesýde eki klýb ta shabýylǵa jıi shyǵyp turdy. Soǵan qaramastan esepti alǵash «Avangard» komandasy ashty. Oıynnyń 11-mınýtynda Kırıll Petrov soqty. Budan keıin Ilıa Mıheev 17-mınýtta esepti ústemeleı tústi. Osylaısha birinshi kezeńde «Barys» atalmysh qarsylasynan 0:2 esebimen jeńilýge májbúr boldy.
«Barys» hokkeıshileri ekinshi kezeńde tarazy basyn teńestirýge umtylǵan edi. Olar oılaǵan maqsatyna jete almady. Bul kezeńde qos komanda da bir-biriniń qaqpasynan sańylaý taba alǵan joq.
Sońǵy kezeńde «Barys» hokkeıshileri kóp kútken shaıbany soǵýǵa múmkindik týdy. Qarsylastar qaqpasy mańynda shabýyl uıymdastyrǵan Andre Peterrson mergendik tanytty. Esep 1:2. Sońǵy mınýttarda «Barys» qaqpashyny altynshy oıynshyǵa almastyrǵan edi. Bul múmkindikti «Avangard» oıynshysy Sergeı Shırokov múlt jibermeı, bos qalaǵan qaqpaǵa shaıba soqty. Esep 1:3. Osylaısha «Barys» komandasy «Avangardtan» jetinshi oıyn qatarynan jeńilip otyr.
Budan keıingi kezdesý de elordada 16 naýryzda bolady. Odan soń eki oıyn 18 jáne 20 naýryzda Balashıha qalasynda ótedi. Tórt kezdesýde jeńimpaz anyqtalmaǵan jaǵdaıda komandalar 22 naýryzda Astanada, 24 naýryzda Balashıhada sheberlik baıqasady. Alty oıynda jeńimpaz belgili bolmasa sońǵy kezdesý taǵy da Astanada 28 naýryzda ótedi.
