QHL: «Barys» «Avangardtan» oısyraı jeńildi
ASTANA. QazAqparat - Elordalyq «Barys» qurlyqtyq hokkeı lıgasy shyǵys konferentsııasynda pleı-off kezeńiniń jartylaı fınalynyń úshinshi oıynyn ótkizdi. Astanalyq klýb Ombynyń «Avangard» (Reseı) komandasymen atalmysh konferentsııanyń fınalyna berisporletin joldamany sarapqa salyp jatyr, dep habarlaıdy QazAqparat tilshisi.
Budan burynǵy eki kezdesýde oıyndar serııasy teńesti. Eki oıynda Astana qalasynda ótken edi. Alǵashqy oıynda «Barys» «Avangardqa» 1:3 esebimen jol berdi. Kelesi kezdesýde bizdiń jigitter ketken esesin qaıtaryp, qarsylasyn 4:2 esebimen tize búktirdi.
Sondyqtan jankúıerler búgingi kezdesýden tartysty báseke kútti. Rasynda, oıyn barysy solaı órbidi. Ombylyq jigitter tizgindi birden qolda ustaýǵa tyrysty. Tóreshilerdiń bura tartý jaǵdaıy da baıqalyp turdy. Aıdyn ústinde ombylyq hokkeıshiler tártip buzyp jatty. Oǵan tóreshiler kóz juma qarady. Esesine «Barys» komandasy birneshe sátte kem oıynshymen qarsy turýǵa májbúr boldy. Mundaı múmkindikti «Avangard» komandasy qur jibere me? «Barys» sapynan Egor Shalapov eki mınýttyq aıyppen aıdynnan ketken 14 mınýtta «Avangrad» hokkeıshisi Andreı Stas alǵashqy shaıbany soǵyp ketti.
Ekinshi kezeńde «Barys» birneshe márte san basymdyǵyna ıe boldy. Degenmen qansha jerden tyrysqanmen astanalyqtar qarsylastar qaqpasynan sańylaý taba alǵan joq. Esesine 22-mınýtta «Avangard» sapynan Egor Shýmakov bizdiń qaqpany dál kózdedi. Esep 2:0. Ekinshi kezeńde taǵy bir shaıba soǵyldy. Ol 35-mınýtta ombylyq hokkeıshi Sergeı Shırokovtyń enshisine jazyldy.
Úshinshi kezeńde «Avangard» esepti ústemeleı tústi. Olardyń qatarynan 44-mınýtta Kırıll Semenov mergendik tanytty. Budan keıin «Barystyń» bas bapkeri qaqpashy Henrık Karllsondy Domınık Grahovınaǵa almastyrdy. Al 52-mınýtta Kodı Franson taǵy bir shaıbany soǵyp ketti. Esep 5:0. Aıta keterligi, onyń 4-i «Avangard» hokkeıshiler sany basym bolǵan sátte soǵyp ketkenin aıta ketelik.
Jalpy alǵanda, búgingi kezdesýde tóreshiler bizdiń hokkeıshilerdi aıdynnan jıi qýdy. Oıyn barysynda «Barys» sapynan hokkeıshiler on márte olardyń jazasyna tartylsa, «Avangard» qatarynan alty hokkeıshi eki mınýttyq aıypqa tartyldy.
Endi taǵy bir oıyn 20 naýryzda Balashıha qalasynda ótedi. Eskerte keterligi, Omby qalasyndaǵy hokkeı arenasy mundaı deńgeıdegi oıyndar ótkizýge daıyn emes. Sondyqtan «Avangard» óz oıyndaryn Máskeý oblysyndaǵy Balashıha qalasynda ótkizýge májbúr. Tórt kezdesýde jeńimpaz anyqtalmaǵan jaǵdaıda komandalar 22 naýryzda Astanada, 24 naýryzda Balashıhada sheberlik baıqasady. Alty oıynda jeńimpaz belgili bolmasa sońǵy kezdesý taǵy da Astanada 28 naýryzda ótedi.
