QHL: «Barys» «Avangardtan» býllıtten jeńilip qaldy
ASTANA. QazAqparat - Elordalyq «Barys» qurlyqtyq hokkeı lıgasyndaǵy jetinshi kezdesýinde Reseıdiń Omby qalasynyń «Avangard» komandasyn qabyldady, dep habarlaıdy QazAqparat.
Ombylyq hokkeı klýby bıylǵy qurlyqtyq hokkeı lıgasyn óte sátti bastady. Alty oıynda qatarynan jeńiske jetti. Tek jetinshi kezdesýinde Magnıtogorskiniń «Metallýrg» komandasynan 0:1 esebimen jeńildi. Al «Barys» buǵan deıingi alty kezdesýdi ala-qula ótkizdi. Alǵashqy oıynda jeńiske jetkenimen, odan keıin qatarynan úsh kezdesýde qarsylastaryna ese jiberdi. Qýanyshtysy, sońǵy eki kezdesýde qarsylastarynan basym túsip, týrnır kestesindegi jaǵdaıyn birshama jaqsartyp aldy. Sondyqtan, olarǵa qarsy «Barys» qandaı deńgeıde oıyn ótkizedi degen saýal kókeıimizde turdy.
Rasynda, «Avangard» bul kezdesýdi de óte qarqyndy bastady. Muzaıdyn ústinde myqtylyǵyn dáleldeýge tyrysty. Olar óz degenine 3-shi mınýtta jetti. «Avangard» sapynan Ilıa Mıheev mergendik tanytty. Odan keıin de ombylyq oıynshylar tizgindi óz qolynan shyǵarmaýǵa kóńil bóldi. Shabýyl shebin údete tústi. Bizdiń jigitter kóp jaǵdaıda olardyń yǵynan shyǵa almady. «Avangard» ekinshi shaıbany 12-shi mınýtta engizdi. Ombylyq Evgenıı Medvedev osylaısha esepti eki shaıbaǵa ulǵaıtty. «Avangard» birinshi kezeńdegi qarqynyn budan keıin de toqtatqan joq. Nátıjesinde 18-shi mınýtta «Barys» 0:3 esebimen jeńilip jatty. Bul joly «Avangard» hokkeıshisi Sergeı Shırokov mergendik tanytty.
Ekinshi kezeńde de ombylyq oıynshylar ózderiniń degenin jasaýǵa bar kúshin saldy. Qýanyshtysy, bul joly bizdiń komanda hokkeıshileri olarǵa laıyqty qarsylyq kórsete bildi. «Barys» jigitteri ońtaıly sátte shaıba soǵý joldaryn izdedi. Nátıjesinde 34-mınýtta Andre Peterson bir gol soqty. Arada tórt mınýt ótkende Brendon Bochenskı esep aıyrmasyn bir shaıbaǵa qysqartty. Ekinshi kezeń 2:3 esebimen «Avangardtyń» paıdasyna sheshildi.
Úshinshi kezeńde «Barys» tarazy basyn teńestirý jolyn izdedi. Dese de, «Avangard» kóp jaǵdaıda oǵan múmkindik bermeı jatty. Soǵan qaramastan 50-mınýtta Roman Starchenko alystan qaqpaǵa shaıba baǵyttap, ol golǵa aınaldy. Esep 3:3. Osylaısha oıyn overtaımǵa ulasty. Onda da jeńimpaz anyqtalǵan joq. Jeńimpaz býllıt serııasynan anyqtaldy.
«Barys» endi kelesi kezdesýin 22 qyrkúıekte Reseıdiń Ýfa qalasynyń «Salavat ıÝlaev» komandasymen ótkizedi. Odan keıin 24 qyrkúıekte Máskeýdiń «Dınamo», 26 qyrkúıekte Podolskiniń «Vıtıaz» klýbtarymen sheberlik baıqasady.
Esterińizge sala ketelik, «Barys» qurlyqtyq hokkeı lıgasyndaǵy alǵashqy kezdesýin «Neftehımık» komandasymen ótkizip, olardy 6:1 esebimen jeńip qaıtqan edi.
Odan keıin «Barys» Reseıdiń Qazan qalasynda «Aq barystan» 3:4 esebimen jeńilip qaldy.
Al 9 qyrkúıekte Reseıdiń Nıjnıı Novgorod qalasynda «Torpedomen» kezdesip, olarmen negizgi kezeńde 6:6 esebimen teń oınady. Overtaımda muzaıdyn ıeleri bir shaıba soǵyp, jeńis «Torpedoǵa» buıyrdy.
Al 12 qyrkúıekte elordada «Neftehımık» 5:4 esebimen basym túsip, apta burynǵy jeńilisiniń esesin qaıtaryp ketti.
14 qyrkúıekte «Barys» óz muzaıdynynda Nıjnıı Novgorod qalasynyń «Torpedosymen» kezdesip, olardy 4:1 esebimen jeńip, qatarynan úsh jeńilis sátsizdigin toqtatty.
Elordalyq klýb 16 qyrkúıekte Astanada «Aq barysty» býllıtten 4:3 esebimen jeńdi.
