QHL: «Barys» «Avangardtan» aılasyn asyra ala ma

«Barys» jarystyń bul satysyna óz tarıhynda úshinshi márte shyǵyp otyr. Elordalyq klýb 2013/2014 jáne 2016/2017 jylǵy kezeńderde jankúıer qaýymyn osyndaı joǵary jetistigimen qýantqan edi. Degenmen ekeýinde de odan árige asa alǵan joq.

2013/2014 jylǵy saıys barysynda «Barys» qurlyqtyq hokkeı lıgasynyń turaqty kezeńinde jalpy komandalyq esepte jetinshi oryn aldy. Nátıjesinde pleı-off kezeńine shyǵyp, jarystyń bul satysynda elordalyq hokkeıshiler Ekaterınbýrgtiń «Avtomobılıst» komandasyn qatarynan tórt márte jeńdi. Aldymen Astanada olardy overtaımda 3:2, 5:4 esebimen tize búktirse, syrt aıdynda eki kezdesýde de 2:1 esebimen basym tústi. Al jartylaı fınalda bizdiń komanda Ýfanyń «Salavat ıÝlaevynan» jalpy oıyndar serııasynda 2:4 esebimen jeńilip qaldy. «Barys» olardy 5:2, 2:1 esebimen jeńse, qalǵan oıyndarda eki márte 2:5, bir márte overtaımda, br márte negizgi kezeńde 2:3 esebimen jeńilip qaldy. Bul jyly «Barysqa» Arı-Pekka Selın bapkerlik jasady.

Al 2016/2017 jylǵy kezeńde «Barys» qurlyqtyq hokkeı lıgasynyń turaqty kezeńinde jalpy komandalyq esepte on úshinshi oryn aldy. Bizdiń komandaǵa pleı-off satysynyń shırek fınaldyq kezeńinde Chelıabiniń «Traktor» komandasy jolyqty. Oıyndar serııasy alty kezdesýge sozyldy. Eloordalyq klýb 5:2, 3:1, eki márte 2:1 esebimen jeńse, atalmysh qarsylasyna 1:5, 1:2 esebimen jol berdi. Oıyndar serııasynda bizdiń hokkeıshiler 4:2 esebimen basym tústi. Jartylaı fınalda Magnıtogorskiniń «Metallýrg» klýbyna tórt kezdesýde 0:4, 4:5, 3:5, 2:3 esebimen jeńildi.

Búgingi qarsylasymyz - «Avangard» Reseıdegi bedeldi klýbtardyń biri sanalady. 2011/2012 jylǵy kezeńde pleı-off kezeńiniń fınalyna deıin jetti. Ázirge ol eń joǵary jetistigi retinde baǵalanyp otyr. Ombylyq klýb jylma-jyl pleı-off satysyna shyǵyp keledi. Sondyqtan kez kelgen komandaǵa olarmen sheberlik baıqasý ońaıǵa túspesi anyq. «Avangard» komandasynyń qurylǵanyna aldaǵy jyly 70 jyl tolady. Qurlyqtyq hokkeı lıgasynda 2008 jyldan beri baq synap keledi.

«Barys» pen «Avangard» komandalary búgingi kúnge deıin 46 márte kezdesken. Onyń 31-i «Avangardtyń» basymdyǵymen aıaqtalsa, 15-de «Barys» jeńiske jetti. Aıta keterligi, sońǵy alty oıynnan beri bizdiń komanda atalmysh qarsylasyn tize búktire almaı keledi. Sońǵy márte «Barys» ombylyq klýbty 2017 jyldyń 10 qazanynda 4:3 esebimen jeńgen edi. Sol sátsizdik pleı-off kezeńinde buzyla ma? Ony ýaqytynda baǵamdaıtyn bolamyz.

Budan keıingi kezdesý de elordada 16 naýryzda bolady. Odan soń eki oıyn 18 jáne 20 naýryzda Balashıha qalasynda ótedi. Tórt kezdesýde jeńimpaz anyqtalmaǵan jaǵdaıda komandalar 22 naýryzda Astanada, 24 naýryzda Balashıhada sheberlik baıqasady. Alty oıynda jeńimpaz belgili bolmasa sońǵy kezdesý taǵy da Astanada 28 naýryzda ótedi.

Aıta keterligi, bıyl «Avangard» óz aıdynyndaǵy oıyndaryn Máskeý oblysynyń Balashıha qalasynda ótkizip keledi. Sebebi, Omby qalasyndaǵy hokkeı arenasy joǵary deńgeıdegi oıyndardy qabyldaýǵa daıyn emes. Sondyqtan «Avangard» Balashıha qalasyndaǵy hokkeı arenasynda ýaqytsha paıdalanyp keledi.

Búgingi kezdesý elordada Astana ýaqytymen 19.30-da bastalady. Kezdesý «QazSport» telearnasynan tikeleı efırde kórsetiledi.