QHL: «Barys» «Avangardqa» taǵy da ese jiberdi
ASTANA. QazAqparat - Elordalyq «Barys» Qurlyqtyq hokkeı lıgasy Shyǵys konferentsııasynda pleı-off kezeńiniń jartylaı fınalynyń tórtinshi oıynyn ótkizdi, dep habarlaıdy QazAqparat tilshisi.
Esterińizge sala ketelik, elordalyq klýb jarystyń bul kezeńinde Ombynyń «Avangard» (Reseı) komandasymen Shyǵys konferentsııa fınalyna beriletin joldamany sarapqa salyp jatyr. Budan buryn qos komanda úsh kezdesý ótkizdi. Onyń ekeýinde «Avangard» basym tússe, bireýinde «Barys» jeńiske jetti.
Alǵashqy eki kezdesý Astana qalasynda ótti. Alǵashqy oıynda «Avangard» bizdiń komandany 3:1 esebimen jeńip ketti. Odan keıin «Barys» jigitteri 4:2 esebimen tize búktirdi. Osylaısha oıyndar serııasyndaǵy tarazy basy teńesti. Úshinshi kezdesýde ombylyq klýb 5:0 esebimen jeńiske jetip, oıyndar serııasynda taǵy alǵa shyqty.
Búgingi kezdesýde qos komandanyń da shabýylǵa kóbirek kóńil bóletini anyq edi. «Avangard» jeńse oıyndar serııasyndaǵy jaǵdaıyn jaqsartyp alatyn. Bizdiń komanda basym túsken jaǵdaıda oıyndar serııasynda taǵy da tarazy basy teńesetin.
Sol sebepti eki komanda birinshi kezeńde shabýylǵa kóbirek shyǵýǵa kúsh saldy. Dese de, qos klýb ta bir-biriniń shabýylyna laıyqty toıtarys berip, qaqpashylardy qapy qaldyryp kete alǵan joq.
Ekinshi kezeńniń de oıyn barysy osylaısha órbip jatty. Jankúıerler óz komandalaryna joǵary deńgeıde qoldaý bildirdi. «Avangard» sapynan 27-mınýtta Aleksandr ıAremchýk mergendik tanytyp, óz komandasyn alǵa shyǵardy. Budan keıin olardyń qatarynda Vıktor Stolberg aıdyn ústinde dóreki qımyl kórsetti. Nátıjesinde «Barys» bes mınýt boıy oıynshy basymdyǵyna ıe boldy. Elordalyq klýb sapynan Mettıý Frettın 28-mınýtta tarazy basyn teńestirdi. Esep - 1:1. Al oıynshy sany basym bolǵan qalǵan ýaqytta bizdiń jigitterge sáttilik jetispeı jatty.
Úshinshi kezeńde ombylyq Maksım Chýdınov qatarynan qos shaıba soǵyp, «Avangard» komandasyn alǵa shyǵardy. Aldymen 47-mınýtta alystan bizdiń qaqpany dál kózdese, 54-mınýtta kezekti ret qanjyǵasyn maılady. Osylaısha, búgingi kezdesýde «Avangard» «Barystan» 3:1 esebimen basym tústi. Oıyndar serııasynda da «Avangard» 3:1 esebimen alda keledi.
Aıta keteıik, kelesi oıyn 22 naýryzda «Astana» qalasynda ótedi. Onda «Barys» pen «Avangard» arasyndaǵy jeńimpaz anyqtalady. Eger ol joly «Barys» jeńiske jetse, 24 naýryzda Máskeý oblysynyń Balashıha qalasynda eki komanda taǵy bir oıyn ótkizedi. Eskerte keterligi, Omby qalasyndaǵy hokkeı arenasy mundaı deńgeıdegi oıyndar ótkizýge daıyn emes. Sondyqtan «Avangard» óz oıyndaryn Máskeý oblysyndaǵy Balashıha qalasynda ótkizýge májbúr. Alty oıynda jeńimpaz belgili bolmasa sońǵy kezdesý taǵy da Astanada 28 naýryzda ótedi.
