QHL: «Barys» alǵashqy oıynda jeńiske jetti
NUR-SULTAN. QazAqparat - Búgin elordalyq «Barys» qurlyqtyq hokkeı lıgasy jańa maýsymyndaǵy alǵashqy oıynyn Latvııada jergilikti «Dınamo» (Rıga) komandasyna qarsy ótkizdi, dep habarlaıdy QazAqparat tilshisi.
Búgingi oıyndy qazaqstandyq hokkeıshiler óte sátti bastady. Birinshi kezeńniń 8-mınýtynda elordalyq klýb sapynan Kertıs Valk esep ashyp ketti. Al 13-mınýtta «Barystyń» taǵy bir hokkeıshisi Nıkıta Mıhaılıs esepti ústemeleı tústi. Oıynnyń 17-mınýtynda Darren Dıts upaı sanyn 3:0-ge jetkizdi.
Ekinshi kezeńde aıdyn ıeleri gol soǵýǵa alǵa umtyldy. Dese de olar «Barystyń» qorǵanysyn buzyp óte alǵan joq. Tek 39-mınýtta «Dınamo» sapynan Pavel Chernov esep aıyrmasyn qysqartýǵa múmkindik aldy.
Úshinshi kezeńniń 59-mınýtynda aıdyn ıeleri taǵy bir shaıba soǵyp ketti. Ony rıgalyq hokkeıshi Denıs Parshın óziniń enshisine jazdy. Kezdesýde «Barys» 3:2 esebimen basym túsip, jańa maýsymdaǵy alǵashqy jeńisin toılady.
Eki komanda búginge deıin 23 márte kezdesken. Onyń 15-i «Barystyń» basymdyǵymen aıaqtalsa, qalǵanynda latvııalyq klýb basym tústi. Aıta keterligi, sońǵy eki kezdesýde «Dınamonyń» mereıi ústem boldy.
Endi «Barys» 5 qyrkúıekte Belarýstiń «Dınamo» (Mınsk), 7 qyrkúıekte Reseıdiń TsSKA (Máskeý) komandalarymen sheberlik baıqasady.
Al 10 qyrkúıekte «Barys» elordada Qytaıdyń «Kýnlýn Red Star» komandasyn qabyldaıdy.
