QHL: «Barys» alǵashqy kezdesýinde «Torpedony» jeńdi
ASTANA. QazAqparat - Elordalyq «Barys» qurlyqtyq hokkeı lıgasy pleı-off kezeńi sanalatyn Gagarın kýbogyndaǵy alǵashqy oıynyn ótkizdi. Astanalyq klýb jarystyń kelesi satysyna beriletin joldamany Nıjnıı Novgorod qalasynyń «Torpedo» komandasymen sarapqa salady, dep habarlaıdy QazAqparat tilshisi.
Eki komanda buǵan deıin 24 márte kezdesti. Onyń 13-i «Barystyń» basymdyǵymen aıaqtaldy. Qalǵanynda «Torpedo» jeńiske jetti.
«Barys» búgingi kúnge deıin tek 2015/2016, 2017/2018 jylǵy kezeńderde shyǵys konferentsııasynda 1/8 fınaldyq satysyna shyǵa alǵan joq.
Eki komanda da pleı-off kezeńiniń kelesi satysyna shyǵýdy aldyna maqsat etip qoıǵany anyq. Sol sebepti olar alǵashqy kezdesýden jaqsy oıyn órnegin kórsetýge umtylatyny belgili edi. Oıyn basynan qos komanda da shabýyl shebine kóbirek kóńil bólgeni baıqalyp turdy. Hokkeıshiler de jıi tártip buzdy. Alǵashqy kezeńde «Barys» sapynan 2, «Torpedodan» 3 hokkeıshi aıdynnan qýyldy.
Osyndaı sátterdiń birinde «Torpedo» hokkeıshisi Robert Sabolıch oıynshylar basymdyǵyn paıdalanyp ketti. Ol 12-mınýtta gol soǵyp, óz komandasyn alǵa shyǵardy. Bul goldan keıin «Barys» hokkeıshileri alǵa qaraı umtyldy. Degenmen olar ózderiniń kózdegen maqsatyna jete almady. Birinshi kezeń «Torpedo» komandasynyń basymdyǵymen aıaqtaldy.
Ekinshi kezeńde «Barys» jigitteri oıyn tizginin qolǵa alýǵa tyrysty. Degenmen tártip jıi buzyldy. Roman Starchenko men Andre Petersson aıdynnan qýylyp úlgerdi. Kezdesý eki komandanyń alma-kezek shabýylymen órbip jatty. Ekinshi kezeńniń sońǵy mınýttarynda «Torpedo» hokkeıshileriniń júıkesi syr bergen sekildi. Birinen keıin biri dóreki áreketimen kózge tústi. Olardyń mundaı qımylyn tóreshiler de nazardan tys qaldyrǵan joq. Olar eki mınýttyq kishi aıyppen jazalandy. Artem Alıaev pen Fılıp Holm aıdynnan qýylǵan sátte «Torpedo» nebári úsh-aq oıynshymen qaldy. Bul ýaqytty bes hokkeıshisimen júrgen «Barys» tıimdi paıdalana alǵan joq. Al 39-mınýtta Andre Petersson tarazy basyn teńestirdi.
Úshinshi kezeń de «Barys» basymdyq tanytýǵa tyrysty. Oıyn basynan qarsylastar qaqpasy mańyn torýyldady. Nátıjesinde «Torpedo» hokkeıshisi aıdynda oıynshylar sany basym bolyp ketýine baılanysty komandalyq aıyppen jazalandy. Osy ýaqytta Brendon Bochenskı «Torpedo» qaqpasynan sańylaý taýyp ketti. Al 43-mınýtta Mettıý Frettın «Barystyń» basymdyǵyn ulǵaıta tústi. Oıynnyń 56-mınýtynda qorytyndy esepti Brendon Bochenskı belgiledi. Esep 4:1. «Barys» pleı-off kezeńindegi alǵashqy kezdesýinde jeńiske jetti.
Esterińizge sala ketelik, pleı-off kezeńi eki komandanyń biriniń tórt jeńisine deıin jalǵasady. «Barys» pen «Torpedo» endi 28 aqpanda Astanada taǵy bir márte sheberlik baıqasady. Odan keıingi eki oıyn 2 jáne 4 naýryzda matchtar Nıjnıı Novgordta jalǵasady. Alǵashqy tórt kezdesýde jeńimpaz anyqtalmaǵan jaǵdaıda 6 naýryzda Astanada, odan keıin 8 naýryzda Nıjnıı Novgorodta oıyndar bolady. Alty kezdesýde jeńimpaz anyqtalmaǵan jaǵdaıda 10 naýryzda sońǵy sheshýshi oıyn elorda tórinde ótkiziledi.
