QHL: «Barys» «Aq baryspen» tartysty oıyn ótkizdi
ASTANA. QazAqparat - Elordalyq «Barys» qurlyqtyq hokkeı lıgasynda ekinshi oıynyn búgin Reseıdiń «Aq barys» komandasyna qarsy ótkizdi. Bul oıynda 3:4 esebimen qarsylasynan jeńildi, dep habarlaıdy QazAqparat tilshisi.
«Aq barys» Reseıdegi azýly komandanyń biri sanalady. Qurlyqtyq hokkeı lıgasynyń basty júldesi - Gagarın kýbogyn úsh márte tóbesine kótergen. Sondyqtan bizdiń «Barys» úshin atalmysh komandamen kezdesý úlken synaq. Elordalyq klýb árbir oıynǵa tyńǵylyqty daıyndalady. Dese de «Aq baryspen» kezdesý olar úshin sheberlik deńgeıin taǵy bir márte tarazylap kórý ekeni belgili.
«Barys» búgingi kezdesýge deıin bir oıyn ótkizdi. Syrt alańda Reseıdiń Nıjnekamsk qalasynyń «Neftehımık» komandasyn 6:2 esebimen tize búktirdi.
Al « Aq barys» óz alańynda bolǵan úsh oıynnyń ekeýinde jeńilip, bireýinde qarsylasynan basym túsken edi. 1 qyrkúıekte Sankt-Peterbýrgtiń SKA klýbynan 1:6 jeńilip, odan keıin 3 qyrkúıekte Belarýs astanasy - Mınsk qalasynyń «Dınamosynan» 2:0 esebimen basym tústi. Al 5 qyrkúıekte Podolsk qalasynyń «Vıtıaz» klýbyna 3:5 esebimen jol berdi.
Búgingi kezdesýde «Barys» komandasy táp-táýir oıyn órnegin kórsetti. Birinshi kezeńde qarsylastar qaqpasy mańynda birneshe shabýyl uıymdastyrdy. Osyndaı urymtal sátterdiń birinde qarsylastar qaqpasyna shaıba soǵyp ta úlgerdi. Ony «Barystyń» jas oıynshysy Álıhan Ásetov óziniń enshisine jazdy. Bul kezdesýdiń 12-mınýty bolatyn. Birinshi kezeń dál osy eseppen aıaqtaldy.
«Aq barysqa» óz alańynda jeńilý unaı qoımaıtyny anyq. Sondyqtan ekinshi kezeńde tarazy basyn teńestirýge olar bar kúshin saldy. Oǵan bizdiń jigitter de tegeýrindi qarsylyq kórsetti. Dese de qazandyq klýbtyń oıynshysy Pol Postma 33-mınýtta shaıba soǵyp, tarazy basyn teńestirdi. Osydan keıin bizdiń qurama birshama álsizdik kórsetti. Nebári bir mınýttyń ishinde qaqpaǵa eki shaıba soqtyryp aldy. Oıyn barysynda 38 mınýt 20 sekýnd ketkende Andreı Markov óz komandasyn alǵa shyǵarsa, arada nebári 16 sekýnd ótkende Rafael Batyrshın esepti 3:1-ge jetkizdi.
Úshinshi kezeńde «Aq barys» 3:1 esebin ustap turýǵa tyrysty. Al «Barys» shabýylǵa kóbirek kóńil bóldi. Bizdiń hokkeıshiler 48-mınýtta esep aıyrmasyn qysqartty. Ony Kevın Dallman óziniń enshisine jazdy. Budan keıin «Barys» shabýyldy údete tústi. Degenmen ol múmkindikterin múlt jiberip jatty. Birneshe márte «Aq barys» oıynshylary muzaıdynnan qýylyp, san basymdyǵyna da ıe bolyp jatty. Kezdesý aıaqtalarǵa 2-mınýt qalǵanda bizdiń komanda alty oıynshymen oınaýǵa sheshim qabyldady. Degenmen «Aq barys» bizdiń bir qatelikti sheber paıdalanyp bos qaqpaǵa shaıba soǵyp ketti. Ony Alekseı Potapov soqty. Oǵan «Barys» jigitteriniń saǵy synǵan joq. Araǵa mınýt salmastan barystyq Darren Dıts esep aıyrmasyn qysqartty. Esep 3:4. Oıyn osylaısha aıaqtaldy.
Endi «Barys» taǵy bir oıynyn syrt alańda ótkizedi. 9 qyrkúıekte Reseıdiń Nıjnıı Novgorod qalasynda «Torpedo» klýbymen sheberlik baıqasady. Al óz muz aıdynyndaǵy alǵashqy kezdesýin búgingi qarsylasy - «Neftehımık» komandasymen 12 qyrkúıekte ótkizedi. Odan keıin óz alańynda 14 qyrkúıekte Nıjnıı Novgorod qalasynyń «Torpedo», 16 qyrkúıekte búgingi qarsylasy - «Aq baryspen» kezdesse, 18 qyrkúıekte Ombynyń «Avangard» komandasyn qabyldaıdy.
