QHL: «Barys» «Admıraldy» jeńdi
NUR-SULTAN. QazAqparat - Búgin elordalyq «Barys» qurlyqtyq hokkeı lıgasyndaǵy kezekti oıynynda Reseıdiń «Admıral» (Vladıvostok) komandasymen kezdesti, dep habarlaıdy QazAqparat tilshisi.
Esterińizge sala ketelik, qazir «Barys» qurlyqtyq hokkeı lıgasy turaqty kezeńindegi jalpy týrnır kestesinde 82 upaımen altynshy orynda tur. Pleı-off kezeńine beriletin joldamaǵa birneshe týr buryn qol jetkizip qoıdy. Al «Admıral» 20-orynda keledi .
Aıta keterligi, «Admıral» sońǵy jeti kezdesýdiń altaýynda qarsylastaryna ese jiberip qoıdy. Qýanarlyǵy, «Barys» sońǵy segiz oıynnyń jetýinde qarsylastaryn qapy qaldyrdy.
«Barystyń» bas bapkeri Andreı Skabelka qurlyqtyq hokkeı lıgasy turaqty kezeńindegi sońǵy eki oıynynda qazaqstandyq jastardyń áleýetin baıqap kórýge sheshim qabyldady. Komanda quramynda barlyq shep boıynsha ózgerister boldy.
Bas bapkerdiń bul táýekeli óz jemisin berdi. Jastar ózderin jaqsy qyrynan tanyta bildi. Oıynnyń 4-mınýtynda «Barys» sapynan Valerıı Orehov mergendik tanytty. Al 6-mınýtta onyń komandalyq áriptesi Pavel Akolzın esepti ústemeleı tústi. Sol 6-mınýtta elordalyq hokkeıshiler taǵy bir márte qarsylasyn qapy qaldyrdy. Al 36-mınýtta Konstantın Glazachev esep aıyrmasyn qysqartty. Oıynda «Barys» qarsylasynan 3:1 esebimen basym tústi.
Aıta keterligi, sońǵy tórt kezdesýde elordalyq klýb atalǵan qarsylasyn jeńe almaı kelgen edi. Elordalyq hokkeıshiler sol ketken eseni qaıtardy. Sondaı-aq, shyǵys konferentsııasynda Reseıdiń «Avangard» komandasyn arta salyp, ekinshi orynǵa kóterildi. Jalpy týrnır kestesinde tqrtinshy orynǵa jaıǵasty.
Endi «Barys» qurlyqtyq hokkeı lıgasy turaqty kezeńinde 26 aqpanda Habarovskiniń «Amýr» komandasymen oınaıdy. Al 1 naýryzda pleı-off kezeńi bastalady. Ázirge «Barys» komandasyna kimniń qarsylas atanatyny belgisiz.
