QHL: «Barys» «Admıraldan» úshinshi márte jeńildi
NUR-SULTAN. QazAqparat - Búgin elordalyq «Barys» qurlyqtyq hokkeı lıgasyndaǵy kezekti kezdesýinde Reseıdiń «Admıral» (Vladıvostok) komandasyn qabyldady, dep habarlaıdy QazAqparat tilshisi.
Qurlyqtyq hokkeı lıgasynyń bıylǵy maýsymynda eki komanda buǵan deıin eki márte kezdesip úlgerdi. Onyń ekeýinde de «Admıraldyń» mereıi ústem boldy.
Qyrkúıektiń 3-i kúni elordada ótken kezdesýde atalmysh reseılik klýb «Barystan» 3:1 esebimen basym túsken edi.
Odan keıin 13 qyrkúıekte Vladıvostokta ótken oıynda taǵy da «Admıral» 3:0 esebimen jeńip ketti.
Sondyqtan búgingi oıynda «Barys» hokkeıshileri bar kúshin salýy tıis bolatyn. Degenmen alǵashqy eki kezeń asa tartysty ótkenmen qos komanda gol soǵatyn qolaıly múmkindikterdi múlt jiberip jatty. Alǵashqy kezeńde qos komanda hokkeıshileri dóreki áreketterimen kózge tústi. Tóreshiler olardy birneshe márte aıdynnan qýýǵa májbúr boldy. Eki komanda tarapynan úsh-úshten oıynshylar eki mınýttyq aıyppen jazalandy.
Úshinshi kezeńde de oıyn tartysty órbidi. Degenmen eki komanda da gol soǵa almady. Kezdesý overtaımǵa ulasty. Overtaımnyń alǵashqy mınýtynda «Admıral» sapynan ıÝng Markýs gol soǵyp, óz komandasyna jeńis syılady. «Barys» qarsylasynan 0:1 esebimen jeńilip qaldy. Osylaısha bıyl olardyń «Admıralǵa» «tisi batpaı» tur.
Aıta keterligi, «Barys» budan burynǵy qatarynan tórt kezdesýde qarsylastarynan basym túsken bolatyn. Elordalyq klýb 9 qazanda Reseıdiń «Salavat ıÝlaev» (Ýfa) komandasyn syrt aıdynda 2:0 esebimen jeńip ketken edi.
Endi «Barys» elordada eki oıyn ótkizedi. Olar 14 qazanda Vladıvostoktyń «Admıralyn» qabyldasa, 16 qazanda Latvııanyń «Dınamo» (Rıga), 20 qazanda Podolskiniń «Vıtıaz» klýbtarymen muz aıdynǵa shyǵady.
