QHL: «Barys» «Admıraldan» taǵy da jeńildi
NUR-SULTAN. QazAqparat - Qurlyqtyq hokkeı lıgasyndaǵy kezekti oıynynda elordalyq «Barys» komandasy Vladıvostokta jergilikti «Admıral» klýbymen kezdesti, dep habarlaıdy QazAqparat tilshisi.
Esterińizge sala ketelik, eki komanda budan buryn 3 qyrkúıekte elordada ózara kezdesti. Bul oıynda «Admıral» 3:1 esebimen jeńiske jetken edi.
Sondyqtan búgingi oıynda «Barys» jaqsy oıyn órnegin kórsetedi degen úmit boldy. Kezdesý tartysty órbidi. Dese de, aıdyn ıelerine sáttilik kóbirek joldas boldy.Alǵashqy kezeńde «Admıral» 1-mınýtta esep ashty. Ony aıdyn ıeleri sapynan Denıs Vıharev oryndady. Budan keıin qos komanda tarapynan esepti ózgertetin birneshe múmkindik bolǵan edi. Onyń eshbiri qaqpadan tabyla qoıǵan joq.
Ekinshi kezeńde qos komanda tarapynan shabýyl kóbirek jasaldy. Dese de, eshbir hokkeıshi mergendigimen kózge túse alǵan joq.
Úshinshi kezeńde «Barys» hokkeıshisi Nıkıta Mıhaılıs shaıba soqqan edi. Tóreshiler ol shaıba erejege saı soǵylǵan joq dep sanady. Sondyqtan esep ózgergen joq. Esesine «Admıral» qatarynan Konstantın Glazychev 44 jáne 59-mınýttarda mergendigimen kózge tústi.
Endi «Barys» 17 qyrkúıekte Almaty qalasynda Reseıdiń «Spartak», 20 qyrkúıekte Chelıabiniń «Traktor» komandalaryn qabyldaıdy.
