QHL: «Barys» 16-shy jeńisine qol jetkizdi
ASTANA. QazAqparat - Búgin elordalyq «Barys» qurlyqtyq hokkeı lıgasynda syrt aıdynda taǵy bir oıyn ótkizdi. Bul joly Slovakııanyń «Slovan» komandasymen sheberlik baıqasty, dep habarlaıdy QazAqparat tilshisi.
Eki komanda budan buryn elordada kezdesti. 7 qazanda bolǵan sol básekede «Barys» 3:0 esebimen basym túsken edi.
«Slovannyń» týrnır kestesindegi jaǵdaıy máz emes. Jalpy týrnır kestesinde 25 komandanyń arasynda 20 orynda keledi. «Barys» 35 upaımen segizinshi orynda tur.
Aıdyn ıeleri bir aı burynǵy jeńilistiń esesin qaıtarýǵa kúsh saldy. Alǵashqy goldy da slovak hokkeıshileri saldy. «Slovan» qatarynan Rýdolf Cherveny 20 mınýtta mergendik tanytty. Oǵan Mıhal Rjelık ádemi pas shyǵaryp berdi. Osylaısha oıynnyń ekinshi kezeńi tartysty bastaldy. Kóp uzamaı «Barys» tarazy basyn teńestirdi. Bul gol 26 mınýtta Nıkıta Mıhaılıstiń enshisine jazyldy. Oǵan Andre Peterson men Darren Dıts gol soǵýǵa múmkindik jasady. Al 30-mınýtta «Barys» hokkeıshisi Dmıtrıı Grents óz komandasyn alǵa shyǵardy. Oıyn sońyna deıin osy esep ózgergen joq. Esep 2:1. «Barys» osylaısha bıylǵy qurlyqtyq hokkeı lıgasyndaǵy 16-shy jeńisine qol jetkizdi.
Esterińizge sala ketelik, budan buryn «Barys» óz aıdynynda Mınskiniń «Dınamo» komandasyn 3:1, Podolskiniń «Vıtıazin» 3:1, Novosibirdiń «Sıbır» klýbyn 5:2 esebimen jeńdi.
Osydan keıin Chelıabiniń «Traktorynan» overtaımda 3:4 esebimen jeńilip qaldy. Al 3 qarashada olar syrt aıdynda Mınskiniń «Dınamo» (Belarýs) komandasyn 3:2 esebimen jeńip ketti.
«Barys» endi bir oıyndy syrt aıdynda ótkizip, 12 qarashada Novosibirdiń «Sıbır» (Reseı) klýbymen kezdesedi. Odan keıin úsh oıyndy qatarynan óz aıdynynda qabyldap, 14 qarashada «Amýr» (Habarovsk), 16 qarashada «Dınamo» (Máskeý), 18 qarashada «Salavat ıÝlaev» (Ýfa) komandalarymen sheberlik baıqasady.
