«Barystyń» úsh matchynyń ýaqyty ózgerdi: QHL jańa kesteni bekitti
ASTANA. KAZINFORM — Qurlyqtyq hokkeı lıgasy 2026-2027 jylǵy maýsymnyń turaqty chempıonaty aıasynda elordalyq «Barystyń» óz alańynda ótkizetin úsh matchynyń bastalý ýaqytyn ózgertti.
Qazaqstandyq klýbtyń baspasóz qyzmetiniń málimetinshe, lıga jeltoqsan aıynda «Spartak», «Ak Bars» jáne máskeýlik «Dınamoǵa» qarsy ótetin kezdesýlerdiń bastalý ýaqytyn aýystyrý týraly sheshim qabyldaǵan. Ózgerister «QHL TV» telearnalaryndaǵy tikeleı kórsetilimderdi uıymdastyrýǵa baılanysty engizilgen. Úsh oıynnyń da bastalý ýaqyty buryn josparlanǵan merzimnen 30 mınýtqa erterek belgilendi.
Atap aıtqanda, 6 jeltoqsanda ótetin «Barys» pen máskeýlik «Spartak» arasyndaǵy № 368 match saǵat 17:00–de emes, 16:30–da bastalady.
Sondaı-aq 23 jeltoqsandaǵy Qazannyń «Ak Bars» komandasyna qarsy № 411 kezdesýdiń ýaqyty ózgerdi. Buǵan deıin matchty saǵat 19:30–da bastaý josparlanǵan edi. Endi komandalar muz aıdynyna 19:00–de shyǵady.
29 jeltoqsanda ótetin máskeýlik «Dınamoǵa» qarsy № 435 match ta osy ýaqytqa aýystyryldy. Kezdesý saǵat 19:30–dyń ornyna 19:00–de bastalady.
Aıta keteıik, «Barys» 26 oıynnan keıin 29 upaı jınap, QHL Shyǵys konferentsııasynyń týrnırlik kestesinde besinshi orynda tur. Buǵan deıin Mıhaıl Kravets shákirtteri Shyǵys konferentsııasynyń kóshbasshysy — magnıtogorskilik «Metallýrgti» óz alańynda 5:4 esebimen jeńgen bolatyn. Kezdesýdiń basty qaharmany KHL-degi alǵashqy het-trıgin jasaǵan amerıkalyq shabýylshy Djastın Beılı boldy.
Budan bólek, elordalyq klýb aldaǵy eki kezdesýin syrt alańda ótkizedi. 18 qarashada «Barys» Ýfada «Salavat ıÝlaevpen», al 20 qarashada Ombyda «Avangardpen» kezdesedi. Buǵan deıin «Barys» úsh oıynǵa sozylǵan sátsizdik serııasyn toqtatqany týraly jazǵan edik.