QHL: «Barys» jetinshi orynǵa kóterildi
ASTANA. KAZINFORM — Qazaqstandyq «Barys» komandasy Qurlyqtyq hokkeı lıgasyndaǵy kezekti oıynyn búgin, 17 qazanda Reseıde «Sıbır» (Novosibir) komandasyna qarsy ótkizdi.
Qurlyqtyq hokkeı lıgasy turaqty chempıonatynda «Barys» 15 oıynnan keıin 18 upaımen segizinshi orynda tursa, «Sıbır» 16 oıynnan keıin 15 upaımen on besinshi orynǵa jaıǵasqan edi.
Kezdesý barysynda qarsylastar jyldam gol soǵatyn múmkindikti izdegen edi. Soǵan qaramastan birinshi jáne ekinshi kezeńde bir-biriniń qaqpasynan sańylaý taba alǵan joq. Sheshýshi kezeńde elordalyq komanda soqqan jalǵyz gol olarǵa jeńis alyp keldi.
«Sıbır» (Novosibir, Reseı) — «Barys» (Astana, Qazaqstan) 0:1 (0:0, 0:0, 0:1)
0:1 — Morellı (Deı, Lıapýnov) — 47:16
Qaqpashylar: Krasotkın — Shýtov.
Osylaısha, «Barys» qarsylasynan 1:0 esebimen basym túsip, týrnır kestesinde jetinshi orynǵa kóterildi.
Elordalyq komanda keıingi alty oıynnyń tórteýinde jeńiske jetse, reseılik klýb ta alty kezdesýdiń tórteýinde qarsylastaryn qapy qaldyrdy.
Eki komanda arasyndaǵy sońǵy bes oıynnyń bireýinde elordalyq klýb jeńiske jetti.
Qazaqstandyq komanda budan keıin eki kezdesýdi syrt aıdynda ótkizedi. Aldymen 19 qazanda Reseıde «Amýr» (Habarovsk) komandasymen kezdesse, 21 qazanda «Admıral» (Vladıvostok) klýbymen sheberlik baıqasady.
