QHL: «Barys» jańa maýsymdaǵy alǵashqy jeńisin toılady

ASTANA. KAZINFORM - Qazaqstandyq «Barys» komandasy búgin Qurlyqtyq hokkeı lıgasyndaǵy kezekti oıynyn Reseıde «Avtomobılıst» (Ekaterınbýrg) komandasyna qarsy ótkizdi.

Kezdesý barysynda qazaqstandyq komanda jyldam gol soǵyp ketti. Oıynnyń bastalǵanyna nebári 27 sekýnd ótkende elordalyq hokkeıshi Kırıll Savıtskıı áriptesi Roman Starchenkonyń bergen pasyn golǵa aınaldyrdy.

Ekinshi kezeńde reseılik hokkeıshiler tarazy basyn teńestirdi. Bul goldy 23-mınýtta Nıkı Merklı óziniń enshisine jazdy. 

Negizgi kezeń 1:1 esebimen teń aıaqtalyp, oıyn overtaımǵa ulasty. Overtaımda Maıkl Maklaýd jeńis shaıbasyn soǵyp ketti.

Osylaısha «Barys» qarsylasynan 2:1 esebimen basym túsip, jańa maýsymdaǵy alǵashqy jeńisine jetti.

Endi qazaqstandyq komanda budan keıin qatarynan eki oıynyn syrt aıdynda ótkizedi. Aldymen 19 qyrkúıekte «Ak Bars» (Qazan) komandasymen kezdesse, 21 qyrkúıekte «Vıtıaz» (Podolsk) klýbtarymen oınaıdy.

Aıta ketsek, budan buryn «Barys» elordada Reseıdiń «Neftehımık» (Nıjnekamsk), «Traktor» (Chelıabınsk), «Amýr» (Habarovsk), Belarýstiń «Dınamo» (Mınsk) komandalarynan jeńilip qalǵan edi.