QHL: «Barys» túzde «Avangardtan» jeńilip qaldy

ASTANA. KAZINFORM – Elordalyq «Barys» Qurlyqtyq hokkeı lıgasy aıasynda túzde ombylyq «Avangardpen» oınady, dep habarlaıdy Kazinform Sports.kz-ke silteme jasap.

Kezdesý aldynda aıdyn ıeleri basty favorıt sanalyp, astanalyq klýbty jeńetini boljanǵan. 

Ǵalym Mámbetalıev jattyqtyratyn komanda buǵan deıin qatarynan 12 ret jeńilgennen keıin sátsizdik serııasyn toqtatyp, elordada Reseıdiń «Sıbır» (Novosibir) komandasyn jeńgen edi. Biraq bul joly sol sátti oıynyn kórsete almady. 

Birinshi kezeń alań ıeleriniń paıdasyna sheshildi. «Avangard» jaýapsyz 3 shaıba soǵyp, basymdyqtaryn anyq ańǵartty. Ekinshi kezeńde Batyrlan Muratov esep aıyrmasyn qysqartqanymen, sheshýshi úshinshi kezeńde aıdyn qojaıyndary taǵy eki gol soǵyp, jalpy esepti 5:1-ge jetkizdi. 

Eske sala keteıik, 31 qańtarda «Barys» komandasy Qurlyqtyq hokkeı lıgasyndaǵy kezekti oıynyn Reseıde «Avangard» (Omby) komandasyna qarsy ótkizetinin habarlaǵan edik.