QHL: «Barys» Reseıdiń «Ak Bars» komandasyna qatarynan eki márte jeńildi

Qazaqstandyq «Barys» komandasy Qurlyqtyq hokkeı lıgasyndaǵy kezekti oıynyn elordada Reseıdiń «Ak Bars» (Qazan) komandasyna qarsy ótkizdi, dep habarlaıdy Kazinform.

«Ak Bars» - elordalyq klýbqa qolaısyz qarsylas. Eki komanda buǵan deıin 50 márte kezdesti. Onyń 11-i elordalyq klýbtyń basymdyǵymen aıaqtalsa, qalǵanynda reseılik komanda jeńiske jetti. Ótken oıynda da qazaqstandyq komanda qarsylasyna 3:5 esebimen ese jiberip qoıdy.

Búgingi kezdesýde de reseılik klýb alǵashqy mınýttan bastap shabýylǵa kóshti. Degenmen alǵashqy kezeńde esep ashylǵan joq.

Ekinshi kezeńde reseılik klýbtan Nıkıta Lıamkın 33, Dmıtrıı Kagarlıtskıı 36-mınýtta eki gol soǵyp ketti.

Úshinshi kezeńde «Ak Bars» oıynshysy Evgenıı Svechnıkov 59-mınýtta qorytyndy esepti belgiledi.

Osylaısha «Barys» qarsylasyna 0:3 esebimen ese jiberdi.

Endi «Barys» aldaǵy oıynyn 10 qarashada elordada Qytaıdyń «Kýnlýn Red Star» (Beıjiń) komandasyna qarsy ótkizedi.

Eske salsaq, budan buryn elordalyq komanda Reseıde «Ak Barsqa» ese jiberip qoıdy.