QHL: «Barys» máskeýlik «Dınamo» komandasynan basym tústi
ASTANA. KAZINFORM - Qazaqstandyq «Barys» komandasy búgin, ıaǵnı 15 qyrkúıekte Qurlyqtyq hokkeı lıgasyndaǵy kezekti oıynyn elordada Reseıdiń «Dınamo» (Máskeý) komandasyna qarsy ótkizdi.
Kezdesý elordalyq komanda úshin sátsiz bastaldy. Oıynnyń bastalǵanyna nebári 40-sekýnd ótkende reseılik klýbtan Maks Komtýaesep ashyp ketti. Birinshi kezeńde qazaqstandyq komanda tarazy basyn teńestire alǵan joq.
Ekinshi kezeńde «Barys» sapynan Ańsar Shaıhmeddenov 24-mınýtta gol soqsa, 37-mınýtta Vıacheslav Kolesnıkov elordalyq klýby alǵa shyǵardy.
Al 47-mınýtta «Dınamo» sapynan Nıkıta Gýsev mergendik tanytsa, qazaqstandyq komandadan Maık Vekkıone 50, 59, Álıhan Ómirbekov 56-mınýtta kózdegen nysanadan múlt ketken joq.
Endi «Barys» aldaǵy oıynyn 18 qyrkúıekte Reseıde «Metallýrg» (Magnıogorsk) komandasyna qarsy ótkizedi.
Eki komanda buǵan deıin 35 márte kezdesken. Onyń 13-i elordalyq klýbtyń basymdyǵymen aıaqtalsa, qalǵan oıynda qarsylas komanda jeńiske jetken.
Eske salsaq, budan buryn qazaqstandyq komanda elordada Reseıdiń «Traktor» (4:3, overtaım), «Amýr» (4:3, býllıt) klýbtarynan basym tússe, Belarýstiń «Dınamosyna» (1:3) ese jiberdi.