QHL: «Barys» komandasy «Traktordan» overtaımda basym tústi

ASTANA. KAZINFORM – Qazaqstandyq «Barys» komandasy búgin, ıaǵnı 7 qyrkúıekte Qurlyqtyq hokkeı lıgasyndaǵy alǵashqy oıynyn elordada Reseıdiń «Traktor» (Chelıabi) komandasyna qarsy ótkizdi.

Jańa maýsymǵa qazaqstandyq klýb joǵary deńgeıde daıyndalýǵa kúsh saldy. Komanda quramyna jańadan oıynshylar keldi. Olardyń qatarynda AQSh hokkeıshileri Ien Makkosh, Maıkl Vekkone, Raılı Ýolsh, Taıs Tompson, kanadalyq Djeık Massı, reseılik Vladımır Volkov, Emıl Galımov keldi.

Sondaı-aq ótken jylǵy quramnan Kırıll Savıtskıı, Batyrlan Muratov, Roman Starchenko jáne ózge de hokkeıshiler jańa maýsymda «Barysty» kúsheıtýge tyrysady.

Foto: Vıktor Fedıýnın / Kazinform

Kezdesý barysynda komandalar jyldam gol soǵýǵa kúsh saldy. Nátıjesinde «Traktor» sapynan Djosh Lıvo 5-mınýtta mergendik tanytty.

Oıynnyń 8-mınýtynda elordalyq klýbtan Ańsar Shaıhmeddenov tarazy basyn teńestirse, Kırıll Savıtskıı 32-mınýtta óz komandasyn alǵa shyǵardy. Odan keıin reseılik komandadan 36-mınýtta Mıhaıl Gorıýnov-Rolgızer óz múmkindigin múlt jibergen joq.

Al 52-mınýtta «Barys» sapynan Taıs Tompson gol soqsa, oǵan reseılik klýbtan 57-mınýtta Perrık Dıýbe tarazy basyn teńestirdi. Negizgi kezeń 3:3 esebimen teń aıaqtalyp, oıyn overtaımǵa ulasty. Overtaımda «Barys» jeńis shaıbasyn soqty. Osylaısha alǵashqy kezdesýde qarsylasynan 4:3 esebimen basym tústi.

Foto: Kazinform / Vıktor Fedıýnın

Qazaqstandyq klýb Qurlyqtyq hokkeı lıgasyndaǵy jańa maýsymda budan keıingi eki oıyndy elordada ótkizedi. Aldymen 9 qyrkúıekte «Amýr» (Habarovsk), 13 qyrkúıekte Belarýstiń «Dınamo» (Mınsk) klýbtarymen sheberlik baıqasady.

Buǵan deıin «Barystyń» elordada alǵashqy oıynyn ótkizetinin jazǵan edik.