QHL: «Barys» qatarynan ekinshi márte jeńiske jetti

Qazaqstandyq «Barys» komandasy Qurlyqtyq hokkeı lıgasyndaǵy kezekti oıynyn elordada Reseıdiń «Dınamo» (Máskeý) komandasyna qarsy ótkizdi, dep habarlaıdy Kazinform.

Astanalyq klýb bıylǵy maýsymdy sátsiz ótkizip keledi. Sońǵy 10 oıynnyń nebári úsheýinde jeńiske jetti.

Qatarynan bes márte jeńilistiń aşy dámin tatqan «Barys» ótken týrda Reseıdiń «Traktor» (Chelıabi) komandasynan basym tústi.

Búgingi kezdesýde de qazaqstandyq komanda jınaqy qımyl kórsetti. Nátıjesinde 3-mınýtta «Barys» hokkeıshisi Ádil Beketaev kózdegen nysanadan múlt ketken joq.

Odan keıin 7-mınýtta Djordan Ýıl tarazy basyn teńestirip ketti.

Al 9-mınýtta elordalyq klýbtan Raılı Barber «Barysty» alǵa shyǵarsa, odan keıin 35-mınýtta reseılik Nıkıta Gýsev óz múmkindigin paıdalandy.

Oıynnyń negizgi kezeńi 2:2 esebimen teń aıaqtalyp, overtaımǵa ulasty. Overtaımda jeńimpaz anyqtalǵan joq. Býllıtte elordalyq klýbtyń joly boldy.

Osylaısha olar qarsylasynan 3:2 esebimen basym túsip, qatarynan eki márte jeńiske jetti.

Endi «Barys» elordada 13 qazanda Reseıdiń «Lokomotıv» (ıAroslavl) komandasymen kezdesse, 15 qazanda «Metallýrg» (Magnıtogorsk) klýbymen sheberlik baıqasady.