QHL: «Barys» qatarynan ekinshi márte jeńiske jetti

ASTANA. KAZINFORM — Qazaqstandyq «Barys» komandasy búgin, ıaǵnı 18 jeltoqsanda Qurlyqtyq hokkeı lıgasyndaǵy kezekti oıynyn Reseıde «Dınamo» (Máskeý) komandasyna qarsy ótkizdi.

Eki komanda týrnır kestesinde joǵary jáne tómengi bóliginde ornalasqan edi. Máselen, «Barys» 32 upaımen 17-orynǵa jaıǵassa, «Dınamo» 48 upaımen 6-orynda keledi.

Sondyqtan elordalyq klýb úshin árbir kezdesýdiń mańyzy artyp tur. Jınaqy qımyldap, upaı qoryn molaıtýǵa kúsh salyp keledi.

Kezdesý barysynda alǵashqy kezeńde komandalar bir-biriniń qaqpasynan sańylaý taba alǵan joq. Jıi shabýyl uıymdastyrdy. Soǵan qaramastan qaqpany dál kózdeı almady. Ekinshi kezeńde reseılik klýb alǵashqy bolyp esep ashty. Bul goldy «Dınamo» hokkeıshisi Maks Komtýa 27-mınýtta mergendik tanytsa, oǵan 30-mınýtta Ańsar Shaıhmeddenov bir golmen jaýap qaıyrdy.

Úshinshi kezeńde qazaqstandyq komanda qatarynan úsh shaıba soǵyp ketti. Aldymen Semen Sımonov 41-mınýtta qaqpany dál kózdese, odan keıin Ien Makkoshen 42, Dinmuhamed Qaıyrjan 52-mınýtta basymdyqty arttyrdy. Al 55-mınýtta «Dınamo» sapynan Nıkıta Gýsev gol soqty.

Osylaısha elordalyq komanda qarsylasynan 4:2 esebimen basym tústi. Bul - «Barystyń» qatarynan ekinshi jeńisi. Olar budan buryn Reseıde «Avtomobılıst» (Ekaterınbýrg) klýbyn 4:1 esebimen tize búktirdi. 

Qazaqstandyq klýb budan keıin tórt oıynyn elordada ótkizedi. Aldymen 21 jeltoqsanda Reseıdiń «Sochı» komandasymen sheberlik baıqassa, odan keıin 23 jeltoqsanda «Traktor» (Chelıabi), 25 jeltoqsanda «Avtomobılıst» (Ekaterınbýrg), 27 jeltoqsanda «Amýr» (Habarovsk) komandalarymen kezdesedi.