QHL: «Barys» elordada «Ladadan» basym tústi

ASTANA. KAZINFORM - Qazaqstandyq «Barys» komandasy búgin, ıaǵnı 14 aqpanda Qurlyqtyq hokkeı lıgasyndaǵy kezekti oıynyn elordada Reseıdiń «Lada» (Tolıattı) komandasyna qarsy ótkizdi.

Qazaqstandyq komanda pleı-off satysyna shyǵý múmkindigin qıyndatyp aldy. Týrnır kestesinde qazir olar 42 upaımen nebári 19-orynǵa jaıǵasyp otyr. Bul jarysty jalǵastyrýǵa kedergisin keltiredi. Sondyqtan elordalyq klýb árbir kezdesýde jeńiske jetýge bar kúshin salyp keledi. Degenmen olardyń tarapynan nátıjeli oıyn baıqalar emes.

Jankúıerler qazaqstandyq komandanyń búgin «Ladany» jeńetinine úmit artty. Óıtkeni, reseılik klýb ta bıyl sátsiz oıynymen kózge túsip júr. Týrnır kestesinde olar 39 upaımen 20-orynda tur.

Kezdesýde reseılik klýb alǵashqy bolyp esep ashty. Olardyń qatarynan Andreı Chıvılev 1-mınýtta mergendigimen kózge tússe, odan keıin qazaqstandyq klýbtan Ien Makkoshen 5, Kırıll Panıýkov 12, Semen Sımonov 14-mınýtta úsh shaıba soǵyp ketti.

Ekinshi kezeńniń 34-mınýtynda «Lada» sapynan Aleksandr Lýkın esep aıyrmasyn qysqartty.

Úshinshi kezeńde «Barystan» Raılı Ýolsh 45, Taıs Tompson 48-mınýtta gol soqsa, oǵan reseılik klýbtan Taıler Graovats 49-mınýtta bir golmen jaýap qaıyrdy.

Osylaısha elordalyq klýb qarsylasynan 5:3 esebimen basym tústi.

Qazaqstandyq klýb budan keıin úsh oıynyn elordada ótkizedi. Aldymen 17 aqpanda Reseıdiń «Metallýrg» (Magnıtogorsk) klýbymen kezdesse, 20 aqpanda Qytaıdyń «Shanhaı aıdaharlary» (Shanhaı), 22 aqpanda Reseıdiń «Severstalv» (Cherepovets) komandalarymen sheberlik baıqasady.