QHL: «Barys» býllıtter serııasynda «Ak Barsqa» ese jiberdi

ASTANA. KAZINFORM - Qazaqstandyq «Barys» komandasy búgin, ıaǵnı 16 qazanda Qurlyqtyq hokkeı lıgasyndaǵy kezekti oıynyn elordada Reseıdiń «Ak Bars» (Qazan) komandasyna qarsy ótkizdi.

Bıyl jańa maýsymdy «Ak Bars» sátti bastady. Qazir olar 21 upaımen 5-orynda keledi. Esesine qazaqstandyq klýb oıyndaryn ala-qula ótkizip júr.

Kezdesý barysynda alǵashqy mınýttan reseılik klýbtyń belsendiligi baıqalyp turdy. Nátıjesinde atalǵan klýb sapynan Grıgorıı Denısenko 8, Mıhaıl Fısenko 15-mınýtta eki shaıba soǵyp ketti. 

Qaqpasyna eki gol ótkizip alǵannan keıin «Barys» komandasy alǵa qaraı umtyldy. Kóp uzamaı Vsevolod Logvın 16-mınýtta esep aıyrmasyn qysqartty. Bul - 21 jastaǵy jas hokkeıshiniń elordalyq klýb sapynda soqqan úshinshi goly.

Kezdesý sońyna taman «Barys» sapynan Kırıll Panıýkov 43-mınýtta tarazy basyn teńestirdi. Negizgi kezeń 2:2 esebimen teń aıaqtalyp, oıyn overtaımǵa ulasty. Overtaımda jeńimpaz anyqtalǵan joq. Býllıtte «Ak Bars» jeńimpaz atandy.

Endi qazaqstandyq klýb elordada taǵy bir oıynyn Reseıdiń «Amýr» (Habarovsk) komandasyna qarsy ótkizedi.