QHL: «Barys» býllıtten «Admıraldy» jeńdi

ASTANA. KAZINFORM - Qazaqstandyq «Barys» komandasy búgin, ıaǵnı 13 naýryzda Qurlyqtyq hokkeı lıgasyndaǵy kezekti oıynyn elordada Reseıdiń «Admıral» (Vladıvostok) komandasyna qarsy ótkizdi.

Elordalyq komanda birqatar oıynshynyń jaraqat alýyna baılanysty atalǵan kezdesýge negizinen jastardy alyp bardy. Soǵan qaramastan olar reseılik komandaǵa laıyqty qarsylyq kórsetti.

Oıynnyń alǵashqy sátterinde reseılik klýbtyń belsendiligi baıqaldy. Nátıjesinde olar qatarynan úsh shaıba soǵyp ketti. Bul goldardy Lıbor Shýlak 2, Djek Rodevald 8, Pavel Shen 21-mınýtta óziniń enshisine jazdy.

Oǵan «Barys» hokkeıshisi Álıhan Ómirbekov 28-mınýtta bir golmen jaýap qaıyrsa, Danııl Gýtık 29-mınýtta qaıtadan «Admıraldyń» basymdyǵyn arttyrdy.

Osydan keıin elordalyq komanda jınaqy qımylymen kózge tústi. Aldymen Semen Sımonov 42-mınýtta gol soqsa, odan keıin Mıhaıl Rahmanov 48, Ádil Beketaev 59-mınýtta mergendik tanytty.

Negizgi kezeń 4:4 esebimen teń aıaqtalyp, oıyn overtaımǵa ulasty. Overtaımda jeńimpaz anyqtalǵan joq. Býllıtten «Barystyń» joly boldy. 

Endi «Barys» budan keıin QHL-dyń turaqty kezeńinde tórt oıynyn ótkizedi.

Aldymen Reseıde 15 naýryzda «Amýr» (Habarovsk) klýbymen kezdesse, 17 naýryzda «Sıbır» (Novosibir) komandasymen oınaıdy.

Al elordada 20 naýryzda Reseıdiń «Ak bars» (Qazan), 22 naýryzda «Salavat ıÝlaev» (Ýfa) klýbtarymen kezdesedi.