QHL: «Barys» búgin máskeýlik «Dınamo» komandasymen kezdesedi

ASTANA. KAZINFORM - Qazaqstandyq «Barys» komandasy búgin, ıaǵnı 15 qyrkúıekte Qurlyqtyq hokkeı lıgasyndaǵy kezekti oıynyn elordada Reseıdiń «Dınamo» (Máskeý) komandasyna qarsy ótkizedi.

Oıyn elorda ýaqytymen 19:30-da bastalady.

Eki komanda buǵan deıin 35 márte kezdesken. Onyń 13-i elordalyq klýbtyń basymdyǵymen aıaqtalsa, qalǵan oıynda qarsylas komanda jeńiske jetken.

Keıingi bes kezdesýdiń úsheýinde qazaqstandyq klýb atalǵan qarsylasyna ese jiberdi.

Aıta ketsek, jańa maýsymǵa daıyndyq aıasynda «Barys» hokkeı klýby Astanada ótken Reseıdiń «Sıbır» (Novosibir) komandasymen eki baqylaý oıynynda (3:2, 3:1) jeńiske jetti.

Aıta ketsek, bıyl elordalyq klýbpen AQSh hokkeıshileri Ien Makkosh, Maıkl Vekkone, Raılı Ýolsh, Taıs Tompson, kanadalyq Djeık Massı, reseılik Vladımır Volkov, Emıl Galımov, qazaqstandyq Kırıll Panıýkov, Kırıll Savıtskıı, Batyrlan Muratov, Roman Starchenko jáne ózge de oıynshylar kelisimshartqa qol qoıdy.

Eske salsaq, budan buryn qazaqstandyq komanda elordada Reseıdiń «Traktor» (4:3, overtaım), «Amýr» (4:3, býllıt) klýbtarynan basym tússe, Belarýstiń «Dınamosyna» (1:3) ese jiberdi.