QHL: «Barys» búgin elordada «Sochıge» ese jiberdi

ASTANA. KAZINFORM - Qazaqstandyq «Barys» komandasy búgin, ıaǵnı 21 jeltoqsanda Qurlyqtyq hokkeı lıgasyndaǵy kezekti oıynyn elordada Reseıdiń «Sochı» komandasyna qarsy ótkizdi.

Elordalyq komanda qatarynan eki márte jeńiske jetip, týrnır kestesindegi jaǵdaıyn birshama jaqsartyp alǵan edi. Jankúıerler «Barys» sol sáttilik serııasyn jalǵastyratynyna úmit artqan bolatyn. Degenmen reseılik komanda jınaqy qımyl kórsetip, upaı qoryn molaıtýǵa tyrysty.

Kezdesý barysynda «Sochı» qatarynan eeki shaıba soǵyp ketti. Aldymen 3-mınýtta Denıs Vengryjanovskıı esep ashsa, 4-mınýtta Danııl Seroýh mergendigimen kózge tústi.

Al 5-mınýtta «Barys» sapynan Semen Sımonov gol soqsa, 10-mınýtta reseılik klýbtan Artem Volkov basymdyqty arttyrdy.

Oıynnyń 34-mınýtynda «Sochı» sapynan Kemoron Lı, 58-mınýtta Denıs Vengryjanovskıı qanjyǵasyn maılady.

Osylaısha elordalyq klýb qarsylasyna 1:5 esebimen ese jiberdi.

Qazaqstandyq klýb budan keıin úsh oıynyn elordada ótkizedi. Aldymen 23 jeltoqsanda Reseıdiń «Traktor» (Chelıabi) klýbymen oınasa, 25 jeltoqsanda «Avtomobılıst» (Ekaterınbýrg), 27 jeltoqsanda «Amýr» (Habarovsk) komandalarymen kezdesedi.