QHL: «Barys» alty oıynǵa sozylǵan sátsizdik serııasyn toqtatty
ASTANA. KAZINFORM — Qazaqstandyq «Barys» komandasy búgin, ıaǵnı 16 qazanda Qurlyqtyq hokkeı lıgasyndaǵy kezekti oıynyn elordada Reseıdiń «Avangard» (Omby) komandasyna qarsy ótkizdi.
Alǵashqy mınýttan qazaqstandyq komandanyń belsendiligi baıqaldy. Qazirge deıin qatarynan alty márte jeńilistiń aşy dámin tatqan elordalyq klýb bul joly sol sátsizdikke núkte qoıýǵa kúsh saldy. Ombylyq klýb ta osal qarsylas emes-ti. Týrnır kestesinde ekinshi orynda kele jatqan edi.
Soǵan qaramastan qazaqstandyq komanda jınaqy qımyl kórsetip, jaqsy oıyn órnegin kórsetti.
Oıynnyń 4-mınýtynda Raılı Ýolsh esep ashsa, 5-mınýtta Meıson Morellı kózdegen nysanadan múlt ketken joq.
Odan keıin «Avangard» sapynan Nıkolaı Prohorkın 13, Damır Sharıpzıanov 34-mınýtta eki gol soǵyp, tarazy basyn teńestirdi.
Al úshinshi kezeńde elordalyq komanda qatarynan úsh shaıba soǵyp ketti. Ony Maık Vekkıone 41, Ádil Beketaev 43, Vsevolod Logvın 51, Dinmuhamed Qaıyrjan 57-mınýtta mergendik tanytty.
Osylaısha «Barys» qarsylasynan 6:2 esebimen basym tústi.
Elordalyq klýb endi aldaǵy oıynyn elordada 24 qazanda Reseıdiń «Amýr» (Habarovsk) klýbyna qarsy ótkizedi.