QHL: Astananyń «Barysy» Mınskiniń «Dınamosyn» utty
ASTANA. QazAqparat - Qurlyqtyq hokkeı lıgasynyń kezekti oıynynda «Barys» «Astana Arenada» Mınskiniń «Dınamo» komandasyn qabyldady, dep habarlaıdy QazAqparat tilshisi.
Munyń aldynda Chelıabi qalasynda «Traktordy» overtaımda 5:4 esebimen tize búktirgen astanalyqtar 17 oıynnan keıin 24 upaımen jalpy kestede 11-inshi, Shyǵys konferentsııada jetinshi orynda turǵan-dy.
Al qatarynan segiz márte jeńilis tapqan mınskilikter 19 kezdesýden soń nebári 11 upaı jınap, Batys konferentsııasynda kósh sońynda keledi. Soǵan qaramastan, barynsha tartysty ótken matchtyń birinshi kezeńinde esep ashylǵan joq.
Ekinshi kezeńde «Dınamo» komandasy tártipti jıi buzyp, aıdynnan qýyla bastady. Tipti «Barystyń» bes birdeı oıynshysyna qonaqtardyń úsh qana hokkeıshisi qarsy turýyna týra keldi. Dál osy tusta astanalyqtar esep asha almaǵanymen, qarsylastaryn tyqsyra tústi. Bul óz jemisin berdi. 31-mınýtta Darren Dıts pen Kertıs Valktyń kómegimen Dmıtrıı Shevchenko bıylǵy maýsymdaǵy óziniń úshinshi golyn soqty. Kóp uzamaı «Dınamo» sapynan taǵyda qos birdeı hokkeıshi aıdynnan qýyldy. Olardyń shyǵýyna sanaýly sekýndtar qalǵanda, Roman Starchenko men Nıkıta Mıhaılısten pas alǵan Andre Petersson 37-mınýtta esepti 2:0-ge jetkizdi. Bul onyń bıylǵy birinshiliktegi jetinshi goly edi.
Úshinshi kezeń bastalǵannan keıin bir mınýt óter-ótpeste Denıs Osıpovtyń qaqpaǵa baǵyttaǵan shaıbasyn toqtata almaǵan Henrık Karlsson qapy qaldy - 2:1. Degenmen «Dınamodan» taǵy bir oıynshy qýylǵan sátti aıdyn ıeleri paıdalana bildi. Komandaǵa bıyl qaıta oralǵan Dastın Boıd 48-mınýtta (pas bergen Kertıs Valk pen Mettıý Frettın) óz múmkindigin qalt jibermedi - 3:1.
Match sońyna taman «Dınamony» jattyqtyratyn kanadalyq bapker Gordı Dýaıer táýekelge baryp, qaqpashysyn aıdyndaǵy oıynshyǵa aýystyrdy. Alaıda odan eshteńe shyqpady.
Osylaısha «Dınamo» komandasyn 3:1 esebimen utqan elordalyqtar upaı qoryn molyqtyryp, týrnır kestesindegi jaǵdaıyn jaqsarta tústi. Bul «Barystyń» qatarynan úsh márte jeńisi edi.
Aıta keteıik, Andreı Skabelkanyń shákirtteri óz aıdynyndaǵy kezdesýlerin budan keıin de jalǵastyrady. Olar 26 qazanda Podolskiniń «Vıtıaz», 28-inde Novosibirdiń «Sıbır», 30-ynda Vladıvostoktyń «Admıral», 1 qarashada Chelıabiniń «Traktor» komandasyn qabyldaıdy.
