KHDR Japon teńizi baǵytyna birneshe ballıstıkalyq zymyran ushyrdy
ASTANA. KAZINFORM – Soltústik Koreıa jeksenbi kúni Japon teńizi baǵytyna birneshe ballıstıkalyq zymyran ushyrdy. Bul týraly Ońtústik Koreıa Qarýly kúshteri shtab bastyqtarynyń birikken komıteti málimdedi, dep habarlaıdy Yonhap.
Áskerı málimetke sáıkes, zymyrandar tańǵy saǵat 06:10 shamasynda Sınpho aýdanynan ushyrylǵan. Seýlde yqtımal jańa ushyrylymdar aıasynda baqylaý kúsheıtilgeni atap ótildi.
Ońtústik Koreıa áskeri joǵary jaýyngerlik daıyndyq rejımin saqtap otyrǵanyn jáne KHDR-dyń zymyran synaqtary týraly aqparat almasýdy AQSh pen Japonııamen úılestirip jatqanyn málimdedi.
Buǵan deıin, 8 sáýirde Phenıan qysqa qashyqtyqqa arnalǵan birneshe ballıstıkalyq zymyran ushyrǵan edi. Bul bir kún ishinde eki ret ushyrylym jasalǵan sırek jaǵdaı retinde tirkeldi. Al onyń aldynda belgisiz snarıadtyń ushyrylǵany tirkelip, ol ushqannan keıin kóp uzamaı joǵalyp ketken, boljam boıynsha sátsizdikke ushyraǵan.
Osy synaqtardan keıin Soltústik Koreıanyń memlekettik BAQ-tary kassetalyq oqtumsyǵy bar taktıkalyq ballıstıkalyq zymyran synalǵanyn málimdedi. Olardyń aıtýynsha, ol qoljetimdi aımaqtaǵy nysandardy joǵary dáldikpen joıa alady.
Sondaı-aq elektromagnıttik qarý synaqtan ótkeni jáne qysqa qashyqtyqtaǵy mobıldi zenıttik-zymyran kesheniniń jaýyngerlik tıimdiligi tekserilgeni habarlandy.
Eske sala ketsek, buǵan deıin Soltústik Koreıa elektromagnıtti qarý túrlerin synaqtan ótkizdi.
Al bıyl naýryz aıynda bul el Japonııadaǵy teńiz qaraı 10 shaqty ballıstıkalyq zymyran ushyrdy.
