KHDR Japon teńizine qaraı taǵy zymyran ushyrdy
ASTANA. QazAqparat - KHDR beısenbi kúni Seýlge Rım papasy Frantsıskanyń Koreı túbegine beıbitshilikti úndeý maqsatymen kelip qonýyna sanaýly ǵana mınýt qalǵanda Japon teńiziniń akvatorııasyna jaqyn qashyqtyqty birneshe ballıstıkalyq zymyran ushyrdy. Bul týraly Koreıa Respýblıkasynyń Qarýly kúshter qolbasshylar shtabyna siltememen newsas.net habarlady.
«Zymyran shyǵys jaǵalaýdaǵy Vonsan qalasy aýdanynan soltústik-shyǵys baǵytqa qaraı atyldy», - deıdi KUSh baspasóz hatshysy Om He Sık. - Bizdiń qarýly kúshterimiz jaǵdaıdy jiti baqylaýǵa aldy, osyǵan baılanysty qosymsha sharalar qoldanatyn bolady».
Sarapshylar baǵasy boıynsha, atqylaý jaqyn qashyqtyqtaǵy zymyranǵa laıyqtalǵan 300 mm kalıbrli KN-09 atys qarýymen reaktıvti júıeni jetildirý sheńberindegi synaq retinde júrgizilgen. Ońtústik Koreıa áskerıleriniń málimeti boıynsha, atý jergilikti ýaqytpen 09:30 saǵatta jasalǵan. Zymyran 220 shaqyrym qashyqta, teńizdiń ústine qulaǵan.
«Renhap» agenttigi shtab ofıtserleriniń biriniń: «Shamasy, Soltústik óziniń qarýynyń kúshin kórsetýge tyrysyp, onymen oınaýdy jalǵastyryp jatqan sııaqty», - degen sózin keltiredi.
Seýl qazir mundaı synaqtardy talaı márte baryp qadaǵalaǵan Soltústik Koreıa basshysy Kım Chen Ynnyń bul joly zymyrandy atýǵa qatysqan-qatyspaǵanyn anyqtaýǵa talpynyp jatyr. «KHDR ústimizdegi jyly barlyǵy 105 zymyran atty», - delingen habarlamada.
