KHDR ıadrolyq jáne raketalyq synaqtarǵa moratorııdiń sharttaryn atady
ASTANA. QazAqparat -Amerıka Qurama Shtattary Phenıannyń barlyq sharttaryn oryndaıtyn bolsa (olardyń arasynda amerıkalyq-ońtústikkoreıalyq turaqty áskerı jattyǵýlardy toqtatý bar), KHDR ıadrolyq jarylǵysh zattar men ballıstıkalyq zymyrandardyń synaǵyn ótkizýge moratorıı jarııalaýy múmkin, dep habarlaıdy QazAqparat TASS agenttigine silteme jasap.
Bul týraly sársenbi kúni Úndistandaǵy KHDR elshisi Ke Chhon En úndiniń WION telearnasyna bergen suhbatynda málim etti.
«Belgili bir sharttar boıynsha ıadrolyq jáne raketalyq synaqtarymyzǵa moratorıı qoıý týraly máseleni talqylaýǵa daıynbyz. Mysalǵa, eger amerıkalyq tarap iri áskerı jattyǵýlardy ýaqytsha nemese turaqty negizde toqtatatyn bolsa, onda biz de ýaqytsha toqtatamyz. Koreılik máseleni beıbit túrde qalaı sheshýge bolatynyn talqylaıyq», - dep atap ótti Úndistan elshisi.
Mamyr aıynyń basynda AQSh prezıdenti Donald Tramp Bloomberg jańalyqtar qyzmetine bergen suhbatynda, eger onyń paıdasy bar dep sheshetin bolsa, KHDR kóshbasshysy Kım Chen Ynmen kezdesýge ázir ekendigin aıtqan bolatyn. Degenmen, eki kúnnen keıin AQSh-tyń memlekettik hatshysy Reks Tıllerson amerıkalyq taraptyń sharttary boıynsha qolaıly jaǵdaılar týyndaǵan kezde ǵana Vashıngton Phenıanmen kelissózderdi ótkizýge daıyn bolatynyn eskertip ótken bolatyn.
Ońtústik Koreıanyń prezıdenti Mýn Chje In Koreıa túbegindegi ıadrolyq túıitkilder boıynsha altyjaqty kelissózderdi qaıta jandandyrý qajet dep sanaıdy jáne buǵan AQSh pen Japonııany kóndire alatynyna úmitti. Alaıda Phenıan da qadamdar jasaýy tıis.
