Soltústik Koreıa 13 gektar aýmaqty joıa alatyn kassetalyq bombany sanaqtan ótkizdi
ASTANA. KAZINFORM – Soltústik Koreıa taktıkalyq ballıstıkalyq zymyrandarǵa ornatýǵa bolatyn kassetalyq bombany synaqtan ótkizdi. El bıligi jyl sońyna deıin onyń birneshe túrin áskerge berýge ýáde etti, dep habarlaıdy Yonhap agenttigi.
Koreıanyń Ortalyq telegraf agenttiginiń (TsTAK) málimetinshe, synaq senbi kúni ótkizilgen. Soltústik Koreıanyń Zymyran basqarmasy kassetalyq oqtumsyqtyń jaýyngerlik jaǵdaıda qoldanýǵa jaramdylyǵy men joıqyn kúshin teksergen.
Synaqty Koreıa Eńbek partııasy Ortalyq komıteti bóliminiń birinshi orynbasary, Ortalyq áskerı komıssııa múshesi general Kım Chen Sık baqylaǵan.
Kassetalyq oq-dári jarylǵan kezde ondaǵan, tipti júzdegen shaǵyn oqtumsyqqa bólinip, keń aýmaqtaǵy birneshe nysanaǵa soqqy bere alady.
TsTAK málimetinshe, Zymyran basqarmasyna qarasty ǵylymı-zertteý ınstıtýttary «№2 standartty úlgidegi kassetalyq oqtumsyq» 12-13 gektar aýmaqty joǵary tyǵyzdyqtaǵy joıqyn kúshpen kúlge aınaldyrýǵa qabiletti ekenin rastaǵan.
Zymyran basqarmasynyń bas dırektory kassetalyq oqtumsyqtar maqsatyna qaraı tórt sanatqa bólinetinin málimdedi. Onyń aıtýynsha, jyl sońyna deıin áskerı bólimshelerge operatsııalyq mindetter men nysanalardyń erekshelikterine qaraı osy túrlerdiń barlyǵyn tańdap qoldaný múmkindigi beriledi.
Bıyl sáýirde Soltústik Koreıa Hwasong-11 Ra taktıkalyq ballıstıkalyq zymyranyna ornatylǵan kassetalyq oqtumsyqty synaǵan edi. Sol synaqty el basshysy Kım Chen Yn men onyń qyzy Chjý E baqylaǵan. Sol kezde zymyran júıesine ornatylǵan kassetalyq jáne jaryqshaqty mına oqtumsyqtarynyń joıqyn kúshi tekserilgen.
Eske sala ketsek, 29 qazan kúni Soltústik Koreıa onǵa jýyq ballıstıkalyq zymyran ushyrǵanyn habarladyq.
Al artynsha AQSh Soltústik Koreıaǵa qarsy jańa sanktsııalar engizdi.
