KHDR taǵy da ballıstıkalyq zymyrandardy ushyrdy
NUR-SULTAN. QazAqparat – Sársenbiniń tańynda Koreı Halyq Demokratııalyq Respýblıkasy shyǵys jaǵalaýdan jaqyn qashyqtyqqa ushatyn eki ballıstıkalyq zymyranyn ushyrdy, dep habarlaıdy «QazAqparat» HAA Yonhap agenttigine silteme jasap.
Phenıan bir aptanyń ishinde osymen ekinshi ret zymyran ushyryp otyr.
Ońtústik Koreıanyń Shtab bastyqtary birlesken komıteti zymyrandardyń alǵashqysy jergilikti ýaqytpen tańǵy saǵat 5:06-da, ekinshisi 5:27-de Vonsan portyna jaqyn mańnan ushyrylǵanyn málimdedi.
Komıtettiń esepteýinshe, zymyrandardyń ekeýi de 250 kılometrge, shamamen 30 km bıiktikte ushqan.
Osydan alty kún buryn da KHDR dál osylaı eki zymyranyn ushyrǵan. Biraq olar 50 km bıiktikte 600 km ushty.
«Ballıstıkalyq zymyrandardyń birinen soń birin ushyrý Koreı túbegindegi jaǵdaıdy jaqsartýǵa baǵyttalǵan kúsh-jigerge qaıshy keledi. KHDR tarapyn muny toqtatýǵa shaqyramyz», - delingen komıtettiń málimdemesinde.
Komıtet ókilderiniń aıtýynsha, Soltústik tarapy qarýdy tekseristen ótkizip jatqan bolý kerek.
Aıta keteıik, KHDR BAQ ókilderi ótken aptadaǵy zymyrandardyń ushyrylýyn Ońtústik Koreıa men AQSh-tyń kelesi aıda birlesken áskerı jattyǵýlar ótkizý josparyna qarsylyqtyń belgisi dep atady.
