KHDR Reseımen qarym-qatynasyn jańa deńgeıge kóterýge nıetti
KHDR Syrtqy ister mınıstri Tsoı Son Hı 15-17 qańtar aralyǵynda resmı saparmen Reseıge bardy, dep habarlaıdy Kazinform tilshisi.
Seısenbi kúni KHDR Syrtqy ister mınıstri Tsoı Son Hı reseılik áriptesi Sergeı Lavrovpen kelissózder júrgizdi. Onda taraptar ekijaqty kún tártibindegi ózekti máselelerdi, sondaı-aq eki el arasyndaǵy halyqaralyq deńgeıdegi ózara is-qımyldy, sonyń ishinde Koreı túbegindegi jáne jalpy Soltústik-Shyǵys Azııadaǵy jaǵdaıdy talqylady.
Sergeı Lavrov 2023 jyldyń qyrkúıeginde «Vostochnyı» ǵarysh aılaǵynda Reseı prezıdenti Vladımır Pýtın men KHDR memlekettik ister tóraǵasy Kım Chen Ynnyń kezdesýi barysynda qol jetkizilgen ýaǵdalastyqtardy júzege asyrý boıynsha jumystyń aldyn ala qorytyndylaryn shyǵarý qajettigin atap ótti.
Óz kezeginde KHDR SІM basshysy eki el arasyndaǵy memleketaralyq qarym-qatynas 2024 jyly jańa deńgeıge kóteriletinine senim bildirdi. Osyǵan oraı, joǵary deńgeıli baılanystardy jandandyryp, túrli saıası-mádenı sharalardy ótkizýge qyzyǵýshylyq bildirdi.
Ol sondaı-aq, Kım Chen Ynnyń 2023 jylǵy qyrkúıektegi Reseıge saparynyń nátıjesin eske aldy.
- KHDR Memlekettik keńesiniń tóraǵasy Kım Chen Yn men Reseı prezıdenti Vladımır Pýtın aldaǵy ýaqytta ártúrli saladaǵy yntymaqtastyqty odan ári nyǵaıtýǵa, ózara baılanysty joǵary deńgeıde damytýǵa, eki el halyqtarynyń ál-aýqatyn arttyrý, sondaı-aq ekijaqty qatynastardy odan ári keńeıtýdi jalǵastyrýǵa ýádelesti, - dedi Soltústik Koreıa SІM basshysy.
Kezdesý barysynda KHDR SІM basshysy ótken jyldyń qyrkúıek aıynda Kım Chen Yn Reseı basshysyn ózine yńǵaıly ýaqytta Phenıanǵa kelýge shaqyrǵanyn eske saldy.
RF basshysynyń baspasóz hatshysy Dmıtrıı Peskov BAQ-qa bergen suhbatynda sapardyń yqtımal kúnin atamady, biraq onyń egjeı-tegjeıleri kelisilgennen keıin jaqyn bolashaqta bolatynyn atap ótti.
Sol kúni eki eldiń syrtqy ister mınıstrleri Kremlde ótken kezdesýde Reseı prezıdenti Vladımır Pýtındi konsýltatsııalardyń nátıjesi týraly habardar etti.
