KHDR narazylyǵyna qaramastan Ońtústik Koreıa men AQSh áskerı jattyǵýlar ótkizedi
SEÝL. QazAqparat - Sársenbi kúni Ońtústik Koreıanyń Qorǵanys mınıstrligi AQSh-pen birlesken áskerı áýe oqý-jattyǵýlary josparǵa saı ótkiziletinin málimdedi, dep habarlaıdy Renhap agenttigi.
Bul jaıly jattyǵýlarǵa narazylyq bildirgen Soltústik Koreıa ońtústiktegi kórshisimen ótýi tıis joǵary deńgeıli kelissózderdiń bolmaıtynyn jarııalaǵan soń málim etilgen.
Eki aptaǵa josparlanǵan aýqymdy Max Thunder jattyǵýlary 11 mamyrda bastalǵan edi. Oǵan shamamen 100 áskerı ushaq, sonyń ishinde segiz F-22 joıǵysh ushaǵy, birneshe F-15K jáne F-16 ushaqtary jumyldyrylǵan.
«Jattyǵýlar josparǵa saı ótip jatyr. Ońtústik Koreıa men AQSh-tyń osy máseledegi ustanymdary sáıkes keledi», - delingen Koreıa Respýblıkasy Qorǵanys mınıstrliginiń málimdemesinde.
Ońtústik Koreıa men AQSh qorǵanys vedomstvolarynyń ókilderi resmı Phenıannyń sársenbide ótýi tıis koreıaralyq kelissózderdiń bolmaıtyny týraly kenet qabyldaǵan sheshimin talqylaý úshin shuǵyl otyrys ótkizdi.
Óz kezeginde, Soltústik Koreıa ortalyq aqparat agenttigi (KCNA) oqý-jattyǵýlardy qatań synap, eki koreı eli arasyndaǵy qarym-qatynastar jaqsara túsken kezdegi arandatý jáne basa-kóktep kirýge daıyndalý dep atady.
Munyń aldynda ǵana jattyǵýlarǵa AQSh-tyń V-52 strategııalyq bombalaýshy ushaǵy qatyspaıtyny aıtylǵan. Phenıan AQSh-tyń bombalaýshy ushaǵynyń Koreı túbeginiń áýesinde paıdalanylýyna birneshe márte narazylyq bildirgen bolatyn.
Eske sala keteıik, 27 sáýirde Ońtústik Koreıa men Soltústik Koreıa basshylarynyń joǵary deńgeıdegi kezdesýinde eki taraptyń bir-birine baǵyttalǵan barsha qastyq áreketterdi toqtatýdy kózdeıtin tarıhı deklaratsııaǵa qol qoıyldy. Sondaı-aq taraptar 15 tamyzda Azat etý kúnine oraı 1950-53 jyldardaǵy Koreıa soǵysy kezinde ajyrap ketken otbasylardy kezdestirýge kelisken bolatyn.
