KHDR men QHR basshylary Beıjińde kezdesti
BEIJІŃ. QazAqparat - Beıjińde KHDR basshysy Kım Chen Yn QHR Tóraǵasy Sı Tszınpınmen kezdesti, dep habarlaıdy QHR-daǵy «QazAqparat» HAA menshikti tilshisi Qytaıdyń ortalyq telearnasyna silteme jasap.
KHDR kóshbasshysynyń Qytaıǵa beıresmı sapary qytaılyq taraptyń shaqyrtýymen 25-28 naýryz aralyǵynda ótti. Eki memleket basshysynyń kelissózderi Búkilqytaı halyq ókilderi quryltaıy ǵımaratynda ótti. Soltústik Koreıa qonaǵy men onyń jubaıy Lı Sol Chjýdyń qurmetine Dıaoıýıtaı memlekettik rezıdentsııasynda banket boldy. Oǵan Sı Tszınpın men onyń jubaıy Pen Lııýan, QHR Memlekettik keńesiniń premeri Lı Ketsıan, QHR tóraǵasynyń orynbasary Van Tsıshan, basqa da sheneýnikter qatysty.
«Sapar erekshe ýaqytta ótip jatyr jáne onyń mańyzy zor. Biz bul sapardy joǵary baǵalaımyz (...) Qytaı men KHDR dástúrli dostyǵynyń negizi qalandy jáne ary qaraı damı bermek. Bul bizdiń birlesken teńdesi joq ıgiligimiz», - dedi Sı Tszınpın Kım Chen Ynmen kezdesý kezinde.
Qytaı kóshbasshysy ekijaqty qarym-qatynasty damytý boıynsha 4 usynysty alǵa tartty: baılanysty joǵary deńgeıde jalǵastyrý, partııalar arasynda ózekti máseleler boıynsha pikir almasý, beıbit damýdy, gýmanıtarlyq yntymaqtastyqty, ásirese eki el jastarynyń arasynda nyǵaıtý.
Kım Chen Yn óz tarapynan Qytaı kóshbasshysynyń qaıta saılanýymen quttyqtady.
«Qytaımen jańa jaǵdaıda dostastyqty damytý - KHDR-diń strategııalyq tańdaýy jáne bul qandaı jaǵdaıda da ózgerissiz qalady», - dedi ol.
Eki el basshylary áleýmettik-ekonomıkalyq damý, halyqaralyq jaǵdaı men Koreıa túbegindegi ahýal týraly pikir almasty.
«Kım Ir Sen men Kım Chen Irdiń ósıetine sáıkes, Koreıa túbegin denýklearızatsııalaý boıynsha belsendi kúsh salamyz. Jáne bul ustanym ózgermeıdi», - dep atap ótti Soltústik Koreıa kóshbasshysy.
