KHDR kóshbasshysy Gýam baǵytyna zymyran ushyrý josparyn talqylady
ASTANA. QazAqparat - KHDR áskerı komandovanıesi kúsh kórsetý maqsatynda Gýam araly baǵytyna zymyran jiberý jospary jaıly el prezıdenti Kım Chen Ynge esep berip, shıelenisti báseńdetý úshin AQSh-qa arandatýdan bas tartýǵa keńes berdi.
Dúısenbi kúni Kım Chen Yn Koreı halyqtyq armııasynyń strategııalyq kúsh qolbasshylyǵynda boldy, dep habarlaıdy «QazAqparat» HAA Koreı ortalyq telegraftyq agenttigine (KOTA)silteme jasap.
KHDR kóshbasshysy «Koreı túbegindegi jaǵdaıdy kúrdelendirip otyrǵan» AQSh-qa «sanaly túrde» «aǵymdaǵy jaǵdaı qaı tarapqa qolaısyz bolatyndyǵyn» tarazyǵa salyp baǵamdaýǵa keńes berdi», - dep jazǵan KOTA Vashıngtondy «KHDR-ǵa qarsy menmenshil arandatýshylyqty toqtatýǵa jáne óziniń birjaqty talaptarynan bas tartýǵa» shaqyrdy.
Habarlamada sondaı-aq, eger AQSh «Koreı túbegi men onyń tóńiregindegi aımaqta óziniń tótenshe qaýipti jáne aqylǵa qonymsyz áreketterinen bas tartpasa» Phenıan mańyzdy sheshim qabyldaıtyndyǵy aıtylǵan.
Soltústik Koreıa kóshbasshysy áskerıler «partııa sheshim qabyldaǵan kez-kelgen ýaqytta daıyn bolýlary tıistigin» atap ótti. Buǵan qosa, KOTA Kım Chen Yn «ıankılerdiń aqylǵa qonymsyz ári albyrt áreketterin taǵy biraz baqylaǵysy keletindigin» habarlady.
Ótken aptada AQSh prezıdenti Donald Tramp jýrnalısterge Phenıan Vashıngton tarapyna qoqan-loqy kórsetýin doǵarýy tıistigin málemdegen bolatyn. Ol bul áreketterge «álem buǵan deıin kórmegen otpen jáne qaharmen» jaýap qaıtarýǵa ýáde etti.
