KHDR-da Kım Ir Senniń týǵanyna 100 jyl tolýyna arnalǵan saltanatty sharalar bastaldy
ASTANA. 8 sáýir. QazAqparat - KHDR astanasynda 15 sáýirde atalyp ótetin «Kún kúni» dep atalatyn Kım Ir Senniń týǵanyna 100 jyl tolýyna arnalǵan kınofestıval bastaldy, dep habarlady ITAR-TASS.
Phenıandaǵy kınofestıvalǵa «Prezıdent Kım Ir Sen jáne kóshbasshy Kım Chen Ir halyqtyń ál-aýqatyn jaqsartý jolynda árqashan birge boldy», «Uly jáne tamasha komandırdiń basshylyǵymen» derekti fılmderi, «Koreıa juldyzy», «Ulttyń Kúni», «Meniń elim», «Pektýsan taýy», «Fotosýret» jáne basqa da kórkem fılmder usynylady. Bul aradaǵy Pektýsan taýy - koreıaler úshin Kım Chen Ir dúnıege kelgen qasıetti jer. Jergilikti baspasózdiń habarlaýynsha, bul lentalardyń barlyǵy «Kım Ir Senniń óshpeıtin revolıýtsııalyq erlikterin shynaıy beıneleıdi». 10 kúndik kınofestıval Phenıannyń barlyq kınoteatrlarynda jáne eldiń basqa da qalalarynda ótedi.
Merekege oraı KHDR-dyń «alǵashqy jáne máńgi prezıdentine» arnalǵan eskertkish markalar serııasy shyǵaryldy. Keıbir mınıatıýralarda Kım Ir Sen zaıyby, japondarmen kúrestegi batyr sanalǵan Kım Chen Sýkpen birge beınelengen. Ol Kım Ir Senmen jáne Kım Chen Irmen birge Pektýsan taýynyń úsh uly qolbasshysy bolyp sanalady. Shara aýqymynda ejelgi koreı jekpe-jegi - thekvondodan jarystar bastaldy. 11 sáýirde munda dástúrli «Sáýir kóktemi» festıvali bastalady, oǵan ártúrli elderden 800-ge jýyq ártister qatyspaq, olardyń arasynda Reseı, Qytaı, Italııa jáne Frantsııa óner sheberleri bar. 12 sáýirde chýchhe ıdeıasy jaqtastarynyń Búkilálemdik kongresiniń saltanatty ashylýy ótedi. Onyń basty taqyryptary - ımperalızmmen kúres, chýchhe ıdeıasy negizinde jańa beıbit jáne gúldengen qoǵam qurý bolmaq. Chýchhe koreı tiline aýdarǵanda «ózindik biregeı», «ózine ózi qoja» degen uǵymdy bildiredi, ol 1994 jyly qaıtys bolǵan respýblıka prezıdenti Kım Ir Sen jasaǵan KHDR-dyń memlekettik ıdeologııasy.
Saltanattardyń basty sharasy jasandy jer serigin ushyrý bolmaq. BUU, Reseı, AQSh, Ońtústik Koreıa, Japonııa KHDR-dy bul ıdeıadan bas tartýǵa shaqyrdy. Alaıda KHDR jer seriginiń beıbit maqsatta ekenin aıtyp aqtalýda.
«Kún kúni» merekesin reseılik, qytaılyq, amerıkandyq jáne japondyq telekompanııalardyń jýrnalısteri kórsetetin bolady.
