KHDR AQSh pen Ońtústik Koreıa «aıaýsyz jazadan» qutyla almaıtyndyǵyn málimdedi
ASTANA. QazAqparat - AQSh pen Ońtústik Koreıa «aıaýsyz jazadan» qutyla almaıdy. Mundaı málimdemeni seısenbi kúni Koreı halyqtyq armııasynyń shtaby Phanmýndjom shekara beketinde jasady. Bul jaıly TASS agenttigi habarlady.
«Olar aıaýsyz jazadan qutyla almaıdy», - dep habarlaıdy Kyodo agenttigi Ońtústik Koreıa men AQSh-tyń birlesken komandalyq-shtabtyq oqýlarynyń bastalýyna oraı KHDR tarapy jasaǵan málimdemeni keltire otyryp.
Ońtústik Koreıa men AQSh-tyń birlesken komandalyq-shtabtyq oqýlary dúısenbi kúni bastaldy. Ońtústik Koreıa prezıdenti Mýn Chje Inniń málimdeýinshe, oqýlar tek qorǵanys maqsatyn kózdeıdi jáne Koreı túbegindegi shıelenisti arttyrýǵa áste baǵyttalmaǵan. Áskerı qyzmetkerlerdiń oqý merzimi qashan aıaqtalatyny ázirge belgisiz.
Ońtústik Koreıanyń ulttyq qorǵanys mınıstrligi olardyń tarapynan oqýǵa byltyrǵy jylǵydaı - shamamen 50 myń áskerı qyzmetshi tartylǵandyǵyn málim etti. AQSh tarapynan oqýǵa 17,5 myń áskerı qyzmetshi qatysýda. Bul byltyrǵy jylmen salystyrǵanda 7,5 myńǵa az.
KHDR atalmysh birlesken komandalyq-shtabtyq oqýlardy Koreı túbegindegi shıelenisti kúsheıtýge baǵyttalǵan dushpandyq áreketter dep sanaıdy.
