QHA jobalary aıasynda ardagerlerge 30 mln. teńgeden astam qarjyǵa kómek kórsetildi

ASTANA. QazAqparat - Qazaqstan halqy Assambleıasynyń «Qamqor» jáne «Bolashaq ıgiligi úshin estelik» jobalary aıasynda Uly Otan soǵysy ardagerlerine 30 mln. teńgeden astam qarjyǵa kómek kórsetildi. Bul týraly búgin Ortalyq kommýnıkatsııalar qyzmetindegi brıfıngte QR Prezıdenti janyndaǵy «Qoǵamdyq kelisim» RMM dırektory Natalıa Kalashnıkova málim etti.

«Qazaqstan halqy Assambleıasynyń jyly aıasynda «Qamqor» jáne «Bolashaq ıgiligi úshin estelik» jobalary bastaý aldy. Atalǵan jobalar bizdiń ardagerlerge arnalǵan. Biz Qorǵanys mınıstrligi áskerı-sporttyq mektebiniń bastamasyn qoldadyq. Olar elimizdiń opat bolǵan sarbazdary jerlengen túrli elderde izdestirý jumystaryn iske asyrady. Búginde kóptegen esimder aıqyndalmaǵan. Osy oraıda soǵys bolǵan elderde jerlengen qazaqstandyqtardy anyqtaý sharalary atqarylýda», - dedi ol.

N.Kalashnıkovanyń sózinshe, aktsııa bastalǵaly 15 tarıhı eskertkish qalpyna keltirilgen. Sonymen qatar ardagerlerge 30 mln. teńgeden astam qarjyǵa kómek kórsetildi.