QHA jazyqsyz jandardyń ómirin qıǵan qandaı da bir qylmystyq áreketterdi qatań aıyptaıdy
Qazaqstan halqy Assambleıasynyń úndeýi
Qurmetti otandastar!
18 shilde kúni Almaty qalasynda bolǵan terrorıstik shabýyldyń saldarynan quqyq qorǵaý organdarynyń qyzmetkerleri jaraqattanyp, birnesheýi qaza tapty, qala turǵyndary zardap shekti.
Qazaqstan halqy Assambleıasy bul jantúrshigerlik oqıǵanyń qurbany bolǵan adamdardyń týystary men jaqyndaryna kóńil aıtyp, qaıǵylaryna ortaq ekendikterin bildiredi.
Osynaý qıyn kúnderi Qazaqstannyń barsha halqy Sizdermen birge dep oılańyzdar.
Elbasy - Qazaqstan Respýblıkasynyń Prezıdenti Nursultan Nazarbaev Qaýipsizdik keńesiniń otyrysynda quqyqtyq tártipti qamtamasyz etý úshin barlyq qajetti sharalar qabyldaýdy, adamdar kóp jınalatyn jerlerdi qorǵaýdy, qoǵamdaǵy tynyshtyqty qamtamasyz etýdi tapsyrdy.
Ol el tynyshtyǵyn buzýǵa jol berilmeıtinine, tártipti qalpyna keltirý boıynsha barynsha batyl sheshimder qabyldanatyndyǵyna azamattardyń senimdi bolýy kerektigin atap kórsetti.
Biz Elbasy N. Nazarbaevtyń eldegi qoǵamdyq kelisimdi, tártip pen turaqtylyqty nyǵaıtýǵa baǵyttalǵan is-qımyldaryn tolyǵymen qoldaımyz.
Qazaqstan halqy Assambleıasy jazyqsyz jandardyń ómirin qıǵan mundaı adamshylyqqa jatpaıtyn aktini, eldegi beıbit ómir men tynyshtyqty buzatyn qandaı da bir qylmystyq áreketterdi qatań aıyptaıdy.
Biz barsha Qazaqstan halqynyń zorlyq-zombylyqtyń, radıkalızm men ekstremızmniń qandaı da túrleriniń taralýyna bir adamdaı qarsy turatyndyǵyna senimdimiz.
Qazaqstan halqy Assambleıasy qylmystyq áreketterge tosqaýyl qoıǵan ishki ister organdarynyń qyzmetkerlerine zor rızashylyǵyn bildiredi. Biz qylmyskerlerdiń áreketterinen zardap shekken barlyq adamdardyń tezirek saýyǵyp, qatarǵa qosylýlaryna tilektespiz.
Búginde árbir Qazaqstan azamaty eldegi beıbit ómir men tynyshtyqty kóziniń qarashyǵyndaı saqtaýǵa tıis degen senimdemiz.
Bizdiń árqaısymyzǵa Otanymyzdyń taǵdyry erekshe qymbat.
Qazaqstan patrıottary úshin táýelsizdik, saıası turaqtylyq pen qoǵamdyq kelisim eń qasıetti qundylyq bolyp keldi jáne solaı bola da bermek.
Qazaqstan halqy Assambleıasy Qazaqstan halqynyń elimizdegi beıbit ómir men kelisimdi shaıqaltýǵa baǵyttalǵan kez kelgen áreketiniń júzege asýyna Bolashaǵy birtutas ult retinde jol bermeıtinine senimdi.
Biz - taǵdyrymyz ortaq birtutas Elmiz!
Qazaqstan halqy Assambleıasynyń Keńesi,
2016 jylǵy19 shilde, Astana qalasy
