QHA úndeýi: N.Nazarbaevtyń Prezıdent saılaýyna qatysýy - azamattyq paryz ben jaýapkershiliktiń aıqyn kórinisi
«QazAqparat» HAA úndeý mátinin jarııalaıdy.
Qurmetti otandastar!
Búgin barsha Qazaqstan halqy bizdiń Otynymyzdyń ómirindegi taǵdyrly jáne tarıhı oqıǵanyń qatysýshysy ári kýágeri boldy.
«Nur Otan» partııasynyń XVI-shi sezi bir aýyzdan Nursultan Ábishuly Nazarbaevty kezekti merzimge Qazaqstan Respýblıkasy Prezıdenttigine úmitker etip usyndy.
«Nur Otan» partııasy seziniń sheshimi Qazaqstan halqy Assambleıasynyń kezekten tys Prezıdent saılaýyn 2015 jyly ótkizý týraly búkilhalyqtyq qoldaýǵa ıe bolǵan bastamasynyń tereń negizdiliginiń jáne zańdylyǵynyń aıǵaǵy bolyp tabylady.
28 aqpanda Qazaqstan halqy Assambleıasy Elbasy, Qazaqstan Respýblıkasynyń Tuńǵysh Prezıdenti Nursultan Ábishuly Nazarbaevtan óziniń kandıdatýrasyn kezekten tys Prezıdent saılaýyna usynýyn suraǵan bolatyn.
Bul qadamǵa bizdiń elimiz ben onyń halqynyń bolashaǵy aldyndaǵy joǵarǵy jaýapkershilik, qoǵamnyń turaqtylyǵy men birligin, erteńgi kúnge degen nyq senimdi, jumys oryndaryn jáne áleýmettik kepildikterdiń, jalaqy men shákirtaqynyń saqtalýyn qamtamasyz etýge degen nıet túrtki bolǵan edi.
Bizdiń osy bastamamyzdy qoldap myńdaǵan azamattar, iri óndiris ujymdary, aýyl sharýashylyǵy salasynyń qyzmetkerleri, úkimettik emes uıymdar jáne etnomádenı birlestikter ún qosty.
Osy arqyly Qazaqstan halqy júrgizilip otyrǵan salıqaly ishki jáne syrtqy saıasatqa tolyq qoldaýyn bildirdi, joǵary azamattyq jaýapkershilik pen patrıotızm úlgisin tanytty.
Qazaqstan halqy Assambleıasy qazirgi Prezıdentimiz Nursultan Ábishuly Nazarbaevtyń kandıdatýrasynyń Qazaqstan Prezıdenttigine usynylýyna erekshe yqylaspen qoldaý bildiredi.
Bul qadam memleket pen qoǵamnyń naqty is qımyl jospary - «Nurly jol - bolashaqqa bastar jol» jańa ekonomıkalyq saıasatynyń júzege asýynyń, jaýapty, turaqty jáne salmaqty ishki jáne syrtqy saıasatymyzdyń ári qaraı irkilissiz iske asýynyń biregeı sharty bolyp tabylady.
Nursultan Ábishulynyń Prezıdent saılaýyna qatysýy - bul patrıottyq akt, eldiń tutastyǵyn saqtaýda, memleketti ári qaraı damytý men azamattardyń ál-aýqatyn arttyrýdyń basty mindetterin sheshý úshin ekonomıkany turaqtandyrýdyń, azamattyq jarasym men áleýmettik turaqtylyqty nyǵaıtýdyń qýatty bastaýy bolyp tabylatyn azamattyq paryz ben jaýapkershiliktiń aıqyn kórinisi.
Nursultan Ábishuly Nazarbaevtyń el aldyndaǵy abyroıy, onyń saıası danalyǵy men tereń tájirıbesi, onyń tulǵasyna degen el senimi saılaý naýqanynyń laıyqty deńgeıde ótip, Qazaqstan azamattarynyń erkin tańdaý jasaýyna kepil bolatynyna senimdimiz.
Biz qazirgi Prezıdentimizdiń kandıdatýrasynyń usynylýy halyqaralyq qaýymdastyq úshin Qazaqstannyń syrtqy beıbitshilik pen kelisim saıasatynyń, senim men tııanaqtylyqqa negizdelgen saıasatynyń ózgerissiz qalatyndyǵyna salmaqty dálel bolady dep sanaımyz.
Qazaqstan halqy Assambleıasy keleshek aldyndaǵy jaýapkershiligin sezine otyryp, halyq pen eldiń bıik múddesin eskere otyryp, azamattyq jáne patrıottyq paryzyn oryndaý maqsatynda elimizdiń barlyq azamattaryn kezekten tys prezıdent saılaýyna belsendi túrde qatysýǵa jáne daýys berý arqyly erkin bildirýge shaqyrady.
Biz barsha Qazaqstan azamattaryn bolashaq urpaq úshin, elimizdiń gúldenip damýy úshin óziniń konstıtýtsııalyq quqyǵyn paıdalanýǵa, erikti tańdaý jasaýǵa, saılaýda daýys berýge, bizdiń elimiz ben qoǵamymyzdyń turaqtylyǵy men birligin nyǵaıtýǵa úles qosýǵa shaqyramyz.
