QHA tasqyn aýmaqtaryna 600 tonna gýmanıtarlyq kómek jóneltken
ASTANA. KAZINFORM – ««Assambleıa jastary» respýblıkalyq qoǵamdyq birlestiginiń tóraǵasy Tımýr Jumyrbaev Qazaqstan halqy assambleıasynyń tasqynmen kúreske qalaı atsalysyp jatqanyn málim etti.
«Búgin elordadaǵy Dostyq úıinde «Júrekten júrekke» aktsııasy ótip jatyr. Sonyń aıasynda búgin Soltústik Qazaqstan oblysyna gýmanıtarlyq kómek tıegen 7 kólik shyǵady», - dedi ol ortalyq kommýnıkatsııalar qyzmeti ótkizgen onlaın brıfıngide.
Assambleıa ókili etnomádenı birlestikterdiń jumysyna metsenattar da qoldaý kórsetip jatqanyn atap ótti.
«Qazaqstan boıynsha assambleıanyń atynan 11 myń erikti tasqynmen kúreske atsalysyp jatyr. Qazaqstan halqy assambleıasy tasqyn bastalǵannan beri 600 tonna gýmanıtarlyq kómek jınap, jóneltti. Osy iske atsalysyp jatqan metsenattardyń úlesin eskersek, jınalǵan kómektiń aqshaǵa shaqqandaǵy kólemi 430 mln teńgege jetti. Metsenattar tasqynmen kúreske 35 tehnıka bóldi», - dedi Tımýr Jumyrbaev.
